Засаг дарга Х.Болормаа зөвшөөрөгдсөн бүс рүү малыг нүүлгэн шилжүүлэх ажлыг зохион байгуулах дүүргийн Ажлын хэсэгтэй шуурхай хурлыг 19 дүгээр хороонд хийлээ.

Шуурхай хуралд нийслэлийн ХХААГ-ын Эрчимжсэн мал аж ахуйн хэлтсийн дарга Н.Баярсайхан болон Ажлын хэсгийн бүрэлдэхүүн, 13-20 дугаар хорооны Засаг дарга нар оролцов. Дүүргийн хэмжээнд 189 өрхийн 3130 мал тоологдсон. Өнөөдрийн байдлаар 69 өрхийн 954 малыг нүүлгэн шилжүүлээд байна.

Шуурхай хурлаас дүүргийн Засаг дарга Ажлын хэсэгт дараахь үүрэг даалгаврыг өглөө. Дүүргийн нутаг дэвсгэрт байгаа үлдсэн малыг 2018 оны 05 сарын 25-ны дотор бүрэн нүүлгэн шилжүүлэх, айлуудын нүүхтэй холбоотой тээврийн болон бусад зардалд дэмжлэг үзүүлэх хөрөнгийг Засаг даргын нөөцөөс гаргах, хүн хүчний туслалцаа үзүүлэхийг Онцгой байдлын хэлтэст, нийслэл, дүүргийн Засаг даргын захирамжийн хэрэгжилтийг хангах чиглэлээр шуурхай ажиллахыг Ажлын хэсэгт тус тус үүрэг болголоо.