УИХ-ын чуулганы өнөөдрийн \2020.08.17\ нэгдсэн хуралдаанаар Монгол Улсын 2020 оны төсвийн тухай хуульд өөрчлөлт оруулах тухай, Нийгмийн даатгалын сангийн 2020 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2020 оны төсвийн тухай хуульд өөрчлөлт оруулах тухай хуулийн төслүүдтэй хамт өргөн мэдүүлсэн хуулийн төслүүдийг хэлэлцэж байна. 

Хуулийн төслүүдтэй холбоотойгоор УИХ-ын гишүүд асуулт асууж байна.

УИХ-ын гишүүн С.Чинзориг: 

“Өвөрхангай аймагт “Хүүхэд залуучуудын усан спорт сургалтын төв“ ашиглалтад орсон. 2019 онд 2020 оны төсвийг хэлэлцэхэд ХНХ-ийн сайдын төсвийн багцад оруулахаар ярьж байсан боловсролын яамны багцад оруулах ёстой гээд энэ байгууллагыг төсөвгүй үлдээсэн. Одоо төсөв байхгүй. сая 6 сард барилга бүрэн ашиглалтад орж, улсын комисс хүлээн авч нээлт хийсэн. Эхний хагас жилийн зардлыг шийдэж өгсөн. Энэ байгууллагын урсгал зардлыг шийдэж өгнө үү? Тэгэхгүй бол энэ байгууллага үйл ажиллагаа явуулж чадахгүй болоод байна.

Боловсролын сайдаас асууя. Сонгуулийн өмнө өмнөх Засгийн газрын үед 2020 оны хичээлийн жилд их дээд сургуулийн сургалтын төлбөрийг нэмэхгүй байх, төрийн өмчит сургуулиуд сургалтын төлбөрөө үе шаттайгаар авах боломжийг бүрдүүлнэ. Уян хатан болгох талаар ярьсан. Энэ хэрэгжих үү? Хичээлийн жил эхэлж байгаатай холбоотойгоор иргэд гишүүдэд хандан олон хүсэлт санал ирүүлж байна. АШУҮИС-ийн кредит цаг 87,000 байсан. Одоо 100,000 болж нэмэгдлээ гэх мэт асуудлуудыг ярьж байгаа эцэг эхчүүд олон байна. Үүн дээр салбарын яам ямар бодлого баримталж байна вэ? Төлбөрийг нэмэхгүй байх боломж байна уу?

Элсэлт авахдаа 1 дүгээр курсынхэн төлбөрөө бүртгүүлэхдээ 100% төл гэж шаардаж байгаа юм байна. Хувиар авсан ч төлбөрөөсөө болоод хүүхдээ сургуульд нь оруулж чадахгүй байх нөхцөл үүсээд байна. Их дээд сургуулийн төлбөрийг нэмэхгүй байж, уян хатан байдлаар улирал, хагас жилээр төлөх боломж олгож болох уу?

ХНХ-ын сайдаас асууя. УИХ-аас малчид болон хувиараа хөдөлмөр эрхлэгчдийн нийгмийн даатгал хувиараа төлөх тухай хууль батлагдсан. Хууль 2020 онд хэрэгжинэ гэж хугацааг нь 1 жилээр тогтоосон. Миний баримжаагаар 80 орчим мянган хүн хуулийн дагуу нийгмийн даатгалаа нөхөн төлнө гэсэн тооцоотой 2020 оны төсвийг баталсан. Гэтэл одоо үүссэн нөхцөл байдлаас шадлтгаалан малчид, хувиараа хөдөлмөр эрхлэгчид орлогогүй болж нийгмийн даатгалын шимтгэлээ нөхөн төлж чадахгүй, хуулийн хэрэгжилт хангалтгүй байна. Миний авсан мэдээллээр 5000 хүн л нөхөн төлсөн байна. Энэ хуулийн хугацааг 1 жилээр сунгах шаардлагатай байна. 2021 оны улсын төсвийг боловсруулахдаа энэ хуулийн хугацааг 1 жилээр сунгаж оруулж ирэх хэрэгтэй байх. Ингэж байж малчид, хувиараа хөдөлмөр эрхлэгч 80 гаруй мянган хүн нийгмийн халамжийн гадна үлдэхгүй байх нөхцөл бүрдэнэ.”

Түүний асуултад Боловсролын сайд Л.Цэдэвсүрэн, Сангийн сайд Ч.Хүрэлбаатар, ХНХ-ын сайд А.Ариунзаяа нар хариуллаа.