УИХ-ын чуулганы өнөөдрийн \2020.08.17\ нэгдсэн хуралдаанаар Монгол Улсын 2020 оны төсвийн тухай хуульд өөрчлөлт оруулах тухай, Нийгмийн даатгалын сангийн 2020 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2020 оны төсвийн тухай хуульд өөрчлөлт оруулах тухай хуулийн төслүүдтэй хамт өргөн мэдүүлсэн хуулийн төслүүдийг хэлэлцэж байна.  

Хуулийн төслүүдтэй холбоотойгоор УИХ-ын гишүүд үг хэллээ. 

УИХ-ын гишүүн М.Оюунчимэг:

“Энэ цаг үед чухал алхамууд хийхгүй бол болохгүй байгаа тул Засгийн газар бүх боломжоо ашигласан харагдаж байна. Тэр дундаа ААН-ээ дэмжиж, хүүхдийн мөнгө гэх мэт халамжийн бодлого нь ямар хэрэгтэй байгааг харж болохоор байна. Сая Алдарт эхийн одонгоо авах ирсэн ээж нарыг хараад хүүхдийн мөнгийг 2020 он дуустал өгөхөөр шийдвэрлэсэн нь маш зөв болжээ гэж харж байлаа.

Эстони, Латви зэрэг өндөр хөгжилтэй улс орнууд хүн амын өсөлтийн бодлоготойгоо гэр бүлийн хөгжлийн бодлоготойгоо үүнийгээ уяад явдаг. Ер нь хүүхдийн мөнгийг ийм чухал арга хэмжээ болгоод халамж бишээр явдаг учраас цаашид нийгмийн даатгал, эрүүл мэндийн даатгалын тухай, нэмэлт өөрчлөлт, тэтгэврийн шинэчлэлийн хүрээнд шийдэх нь зүйтэй гэж үзэж байна. Төсийн таналтыг харахаар 600 орчим тэрбум төгрөгийн хөрөнгө оруулалт хасагдаж харагдаж байна. Эдийн засгийн эргэлтэд орж байгаа хөрөнгийн эх үүсвэр багасхаар эргээд эрсдэл болох магадлалтай. Хөрөнгө оруулалтаа зогсоохгүй үргэлжлүүлэх нь чухал. Учир нь ажлын байр хадгалах нь чухал. Бид өнөөдөр халамжийн мөнгө өгөхөөс гадна хүн бүр ажилтай байх нь чухал юм. Бүх гишүүд иргэдтэй уулзахад ажлын байр нэмэгдүүлэх, ажилд оруулж өгөөч, МСҮТ-д хүүхдээ сургах хүсэлтэй байгаагаа илэрхийлж байдаг. Энд танах тухай, сонгуулийн төсөв гэж ярихаасаа илүү ажлын байрыг хадгалж, шинээр бий болгосон. Айл өрхүүдийг орлоготой байлгах чиглэлд төсвийн тодотголд илүү анхаараасай гэж бодож байна. Хөрөнгө оруулалтыг танахдаа тендер зарлагдаагүй гэж шалгуур тавих бус иргэдийн амьдрах орчин сайжруулах, иргэдийг ажлын байртай байлгаж байгаа ажлуудыг үлдээх хэрэгтэй байх аа.

Иргэдийн хүсэн хүлээж байгаа нэг зүйл бол ипотекийн зээлийг үргэлжлүүлж, иргэдээ дэмжих юм. Гэтэл энэ нь арилжааны банкин дээрээ очоод хэрэгжихгүй байна. Тиймээс Монголбанк ипотекийн зээл, бизнесийн зээл, барилгын салбарын зээл зэргийг хэвийн үргэлжлүүлэх чиглэлд илүү анхаараасай гэж хүсч байна.”