УИХ-ын Төсвийн байнгын хорооны өнөөдрийн хуралдаанаар, Монгол Улсын Ерөнхийлөгчийн хоригийг хүлээн авсантай холбогдуулан Нийгмийн даатгалын сангийн 2020 оны төсвийн тухай, Нийгмийн даатгалын тухай хуулиудыг хэрэглэх журмын тухай хуульд өөрчлөлт оруулах тухай хуулийн төслийг хэлэлцэв. 

УИХ-ын чуулганы өнгөрсөн долоо хоногийн хуралдаанаар Монгол Улсын 2020 оны төсвийн тухай хуулийн Нийгмийн даатгалын шимтгэлийг хоёр хувиар нэмэхтэй холбоотой заалтад тавьсан Ерөнхийлөгчийн хоригийг хүлээн авсан. Үүнтэй холбогдуулан Нийгмийн даатгалын сангийн 2020 оны төсвийн тухай хуулийг шинэчлэн боловсруулсныг Байнгын хорооны дарга Б.Чойжилсүрэн танилцуулсан. Ингэхдээ хуульд заасны дагуу уг төслийн талаар Засгийн газар, холбогдох бусад байгууллагаас санал авахыг шаардахгүй, Байнгын хороогоор боловсруулсан гэдгийг онцлов. 

Танилцуулгатай холбогдуулан асуулт асуух, зарчмын зөрүүтэй санал гаргах шаардлагагүй хэмээн хуралдаанд оролцсон гишүүд үзсэн. Иймд Нийгмийн даатгалын сангийн 2020 оны төсвийн тухай хуульд өөрчлөлт оруулах тухай хуулийн төслийг анхны хэлэлцүүлгээр нь батлуулах горимын саналыг Байнгын хорооны дарга гаргаж, санал хураав. Гишүүд 54.5 хувийн саналаар дэмжсэн.

Дараа нь Нийгмийн даатгалын тухай хуулиудыг хэрэглэх журмын тухай хуульд өөрчлөлт оруулах тухай хуулийн төслийг анхны хэлэлцүүлгээр нь батлуулах горимын саналыг Байнгын хорооны дарга гаргахад хуралдаанд оролцсон гишүүдийн  олонх дэмжсэн тул энэ талаарх санал, дүгнэлтийг чуулганы нэгдсэн хуралдаанд танилцуулахаар тогтов.