Эгэл хэдэн замчидтайгаа уулзах сайхан. Аль хавар ажлын талбарт гарсан тэд нар маань өвлийн өмнөхөн л гэрийн бараа хардаг ажлын онцлогтой. Хаврын хахир, зуны халуун, намрын сэрүүнийг үл ажран ургах нарнаас шингэх нарны хооронд завгүй ажиллана.

Тэд тавьсан замаа хараад би, бид үүнийг барьж билээ гэж бахархана, урамшина. Даац хэтрүүлэн давхилдах хэнэггүй, жолооч, давагдашгүй гамшиг үер уснаас болж зам эвдрэх вий гэж эмзэглэнэ.

Баруун бүсэд тавигдаж буй зам дээр түр саатаж хэдэн замчидтайгаа хууч дэлгэлээ. Замын туслах ажилтан нийгмийн даатгалаа төлөөд сардаа гар дээрээ 1.800.000-3.500.000 төгрөг авдаг гэнэ. Харин замын инженер туршлага, ур чадвараасаа хамаараад 3.500.000-7.000.000 төгрөгийн цалин авдаг аж. Замын ажилд орон нутгийн залуусыг авдаг ч ихэнх нь анхны цалингаа ч авалгүй ажлаас шантраад алга болдог гэцгээв.

Тэдэнтэйгээ хэдхэн хором хөөрөлдсөн ч зам тавилцаж, замын компани удирдаж явсан залуу эрмэг үедээ эргэж очсон мэт сэтгэлд нэг л өег сайхан. Би энэ хүмүүсийг амьдралд зам тавигчид гэж хэлнэ. Тэд хөдөөд, хөгжилд бас өөрийнхөө болоод өрөөл бусдын амьдралд зам тавьсаар л...