“Эргэх холбоо-9” хөтөлбөрийн уулзалтууд Хэнтийн аймгийн Дадал суманд үргэлжилж байна. Зүүн бүсэд түүхэн аялал жуулчлалыг хөгжүүлэх гол төвүүдийн нэг болоод буй Дадал сум өнгөрсөн жил улсын тэргүүний сум болсон юм.

Дадал суманд өнгөрсөн жилүүдэд улсын төсвийн хөрөнгө оруулалтаар Нутгийн удирдлагын ордон, ЕБС-ийн дотуур байр, нэгдсэн халаалтын зуух, дулаан, цэвэр усны шугам сүлжээ, 100 хүүхдийн цэцэрлэг, спорт цогцолбор, эрүүл мэндийн төвийн өргөтгөл, 35 КВТ-ын цахилгаан дамжуулах шугамын өргөтгөл, цэвэрлэх байгууламж ариутгах татуурга ашиглалтад орсон бол, “Дэлүүн болдог” нисэх буудал, хог хаягдлын ландфиллын байгууламжийн асуудлаа шийдвэрлэжээ.

Мөн Азийн хөгжлийн банкны санхүүжилттэй хэрэгжүүлж буй “Тогтвортой аялал жуулчлалыг хөгжүүлэх төсөл”-ийн хүрээнд “Чингис хаан аялал жуулчлалын цогцолбор” баригдаж буй.

Өмнөх “Эргэх холбоо -Иргэдээ сонсъё” уулзалтуудаар иргэдийн саналыг үндэслэж Дадал сумын Онон, Агац баг үүрэн холбооны сүлжээ тавигдаж, Хилийн цэргийн 0287 дугаар заставын барилгуудын шинэчлэл, тохижилтын ажлууд хийгдсэн бол энэ онд Штабын барилгын ажил үргэлжилж байна.

Дадалчууд хэзээнээсээ хөдөлмөрч зон олон. Жил бүр 5 саяаас дээш литр сүү сааж, нийт 1 тонн цөцгий, аарц, ааруул, 5-аас дээш цөцгийн тос боловсруулж зах зээлд нийлүүлдэг. Мах, сүүний өндөр ашиг шимтэй Монгол улсын 5 дахь бие даасан “Ухаа” үүлдрийн үхэртэй. Тиймээс жилдээ 3 тэрбум төгрөг гаруй орлогыг цагаан идээ, махнаасаа олдог юм.

Тэд Малын индексжүүлсэн даатгалын тухай хуулийг өөрчлөх нь зүйтэй гэж үзэж, төслийн танилцуулгыг дэмжиж байна.

Сэтгүүлч

Сэтгүүлч Б.Хонгорсайхан