М.Нарантуяа-Нара: Сүүлийн 5 жилд 0-7 насны 110 хүүхэд бэлгийн хүчирхийллийн хохирогч болжээ, хүүхдийн эрхийн энэ ноцтой асуудал АН-ын асуудал биш юм уу?
УИХ-ын чуулганы /2025.05.01/-ний өдрийн хуралдаанаар Монгол Улс дахь хүний эрх, эрх чөлөөний байдлын талаарх 24 дэх илтгэлийг сонслоо.
Уг илтгэлтэй холбогдуулан гишүүд үг хэлж, асуулт асуулаа.
УИХ-ын гишүүн М.Нарантуяа-Нара:
ХЭҮК-оос гаргасан Хүний эрх эрх чөлөөний байдлын талаарх 24 дэх илтгэл бол 6 бүлэг зүйлд, 470 хуудас хүний эрхийн зөрчил. Үүн дотор хуудас нэг бүр дээр хүний эрхийн зөрчлийн статистик тоо судалгаа бүх зүйл байна. Ихэвчлэн хүний эрхийн зөрчил, хүний эрхийн зөрчлөөс үүдэлтэй энэ бүх асуудлууд сонгуулийн үеэр улс төрийн намуудын сонгуулийн шоу, пи ар болдог. Ялангуяа АН сонгууль болохоор энэ бүх үзэгдлүүдийн эсрэг маш сайн дуу хоолой болж, ард түмний итгэл найдварыг авч гарч ирчхээд, өнөөдөр яг энэ чухал асуудлыг хэлэлцэж байгаа үед нэр төр, энэ тэрээ гээд байхгүй байгаа нь үнэхээрийн харамсалтай.
Гэхдээ энэ нь харамсаад өнгөрөх зүйл биш. Иргэд олон нийт ч гэсэн өөрсдийнхөө итгэл хүлээлгэж сонгосон , УИХ-ын гишүүд, нам, улс төрийн эвслээсээ тэгш жигд хариуцлага нэхдэг байгаасай гэж бодсондоо үүнийг хэлж байгаа юм. Энэ удаад хүүхдийн бэлгийн хүчирхийллийг онцолж оруулж ирсэн нь учиртай. Жилээс, жилд өсөн нэмэгдэж байгаа энэ асуудлыг өнөөдөр бид нар учир шалтгаан нөхцөл байдлыг нь тодруулаад, хэлэлцэж явахгүйгээр зөвхөн дүн үзүүлэлтийг нь яриад цаашдаа ямар ч ахиц дэвшилтгүй байх юм байна гэсэн баталгааг энд байгаа үзүүлэлтүүдээс харж байгаа юм.
Зөвхөн сүүлийн 5 жилд 0-7 насны /энэ бол2 дугаар ангийн хүүхэд гэсэн үг шүү дээ/ 110 хүүхэд бэлгийн хүчирхийллийн хохирогч болсон байна. Энэ110 хүүхдийг энэ танхимд оруулж ирээд, танхим дотор байгаа сандал дээр суулгах юм бол чуулганы танхим дүүрнэ гээд бод доо. Энэ хүүхдүүдийн асуудал АН-ын асуудал биш юм уу? Яагаад? Сонгууль болохоор бүх нийтийн зовлон зүдгүүр, бэрхшээл, асуудал бэрхшээлийг шоудаж, пиардаж, та нарыг хамгаална гэж санал авч гарч ирдэг байж, өнөөдөр намын нэг гишүүдийнхээ нэр хүнд, яасан ийсэн гээд хуралд суухгүй байгаа юм. Их хурлын ажил нь явдгаараа явж байна. Хэлэлцэх асуудал нь ар,араасаа шил,шилээ дагачихсан байж байна. Өнөөдөр иргэдийнхээ асуудлыг шийдэж, хэлэлцэхгүйгээр ар араасаа хүлээж байгаа ажлуудыг давхардуулаад, бөөгнөрүүлээд орхиод байх юм бол энэ Их Хурал чинь цаашдаа юу болох юм?
ХЭҮК энэ үзүүлэлт, судалгаанууд дээр харьцангуй сайн ажилласан ч, хамтарсан багийн 31820 тохиолдолыг төрөл зүйлээр ойлгомжтой ангилаагүй байгаа нь учир дутагдалтай харагдаж байна. Жишээлбэл, хүүхдээ хүчирхийлээд байгаа хүмүүс яг ямар төрлийн хүмүүс байгаад байгаа юм бэ? Үнэхээр цус ойртчихсон хүмүүс нь хүүхдүүдээ, ураг, төрлөө хүчиндээд байгаа юм уу, эсвэлхойд эцгүүд байгаад байна уу. Үүний учир, шалтгаан нөхцөлийг нь тодруулж мэдэхгүйгээр ажил явахгүй. Түүнчлэн алслагдсан газруудад байгаад байгаа юм уу, нийслэлд үү гэх мэт газарзүйн байршил чухал байна.
Сэтгүүлч
