УИХ-ын чуулганы /2023.10.13/-ны өдрийн үдээс хойших нэгдсэн хуралдаан эхэллээ. Хуралдаанаар хүнс, хөдөө аж ахуй, хөнгөн үйлдвэрийн салбартай холбоотой асуудлаар цаг үеийн мэдээлэл сонсож байна.

Уг асуудлын хүрээнд гишүүд асуулт асууж, байр сууриа илэрхийллээ.

УИХ-ын гишүүн Ж.Батжаргал:

Мал, аж ахуйн салбарын тогтвортой хөгжлийг хангах ёстой олон зүйлүүд байна. Нэгдүгээрт, бэлчээрийн даацын чадамжид нийцэх тухай, бэлчээрийн доройтлыг сайжруулах тухай асуудал байна. Байгалийн ургамлын үр үржүүлэг, түүгээр нөхөн сэргээлт хийх асуудалд ямар бодлого байна вэ?

Тэжээлийн ургамлын тариалалт, олон найрлагат уурагт тэжээлийн түүхий эдэд урамшуулал олгох юм уу. Ингэж байж үйлдвэрийн аргаар боловсруулсан тэжээлийн хэмжээг нэмэгдүүлж, эрсдэлээс урьдчилан сэргийлэх, малын тарга хүчийг өвөл, хаврын хатуу цагт говчихгүй байх бололцоог бүрдүүлэх ёстой юм биш үү. Тиймээс, тэжээлийн будаа, эрдэнэ шиш гэхчлэн зүйлүүдэд урамшуулах өгөх ёстой биш үү?

Малчдын өвөлжөө, хаваржаа дээр нь ногоон тэжээл тариалах үндэсний хөдөлгөөн өрнүүлбэл яасан юм. Хийгээд эхнээсээ аваад байгаа. Нэг хэсэг нь хийхгүй байж боломгүй байна. Жижиг оврын техник хэрэгслийн хангалтыг нь хийгээд явах боломж байна уу?

Мал эрүүлжүүлэлтийн асуудал дээр хөрөнгөө нэмж байгаа. Гэхдээ, бүрэн болж өгөхгүй байна. Тиймээс "Био үйлдвэр"-ийнхээ хүчин чадлыг нэмэгдүүлэх чиглэлд томоохон хөрөнгө оруулалт хийх ёстой. Гадна, дотнын зээл тусламж яриад олон жил болж байна. Үүн дээр дотоодынхоо нөөц бололцоо, төсвөө дайчилбал яасан юм. Үүнийг УИХ, Засгийн газар анхаармаар байна.

Түүний асуултад, ХХААХҮ-ийн сайд Х.Болорчулуун хариулт өглөө.