УИХ-ын гишүүн Б.Найдалаа улс, үндэстний хэл соёл нь тусгаар тогтнолын үндэс болохыг өөрийн цахим хуудсаараа дамжуулан ийн өгүүлснийг хүргэж байна.

Зүүн өмнөд Азийн энүүхэн жаахан нутагт 1000 гаруй хэл, аялга оршин байдаг гэнэ. Уулын ам, жалга болгон нэг хэлтэй гэсэн үг.

Гэтэл Монголын өргөн уудам нутагт хаана нь ч очсон нэг хэл аялгаар ярилцаж ойлголцож болдог гэж гадаадын аялагчид 100 гаруй жилийн өмнө нэг биш цохон тэмдэглэсэн байдаг. Бичиг харилцаа бол бүр төгс, эргэн тойрны улс аймгууд ч монгол хэл бичгээр харилцдаг байв. Соёл, хэлээр эртнээс ижилсэж, хүчтэй төр гүрэн, бичгийн хэл соёл байсны үр дүн биз. Өнөөгийн франц, итали хэлийг өнө эртнээсээ л ийм байсан мэт төсөөлөн боддог ч үнэндээ тун саяхан 1870-аад оны үест л нэгтгэн аль нэг аялгыг нь сонгон нэг бичгийн хэл болгож албажуулж бэхжүүлсэн байдаг юм. Ийм залуухан, саяхан...

Бид өөрсдийгөө бүрэн таньж ойлгож, юутай ба юугүй гэдгээ, өөрсдийн үнэ цэнээ мэдэх, тархины эргүүлгээс гарах нь хөгжлийн үндэс, хүчирхэг болохын суурь болно. Монгол шиг эртнээс нэг бичгийн хэл соёлтой, тэрийг нь одоо ч уншиж ашиглаж болдог улс ард маш ховор. Ийм нэгдмэл хүчтэй хэл соёлтой хэрнээ жалга бүр өөр дээлтэй, хэл аялгатай мэт аяглан ястан болж жижигрэх, тэрийг хөөрөгдөж өөрсдийгөө хэрчиж тасчих нь тэнэглэл.

Цаана чинь бутархайнууд хүртэл нэгдэж нэг гүрэн болчихоод хөгжиж дэвжиж чих хангинуулж байна...