Өчигдөр /2025.08.24/ ХЗДХ-ийн сайд Л.Мөнхбаатар Дотоод хэргийн их сургуулийн 2025-2026 оны хичээлийн жилийн шинэ элсэгчдийн Монгол Улсын цэргийн тангараг өргөх ёслолын ажиллагаанд оролцож, Хууль сахиулах салбарт нэгдэж буй залуусын мартагдашгүй дурсамжит өдрийн гэрч боллоо.

Тэрбээр "Энэ хичээлийн жилд тус сургуульд элсэн суралцахаар бүртгүүлсэн 7000 орчим залуусаас ЭЕШ-ын оноо, эрүүл мэнд, бие бялдар, сэтгэл зүйн гэх мэт шаталсан олон шалгуур болзлыг хангаж, цэргийн хэргийн анхан шатны мэдлэг олгох сургалтад хамрагдаж, сургалтаа амжилттай дүүргэж, хууль сахиулагчдын эгнээнд нэгдэж буй 500 гаруй сонсогчдодоо сурлагын амжилтыг ерөөе!

Монгол Улсын Цэргийн тангараг өргөж, сонсогч мөрдсөө зүүсэн залуус маань их сургуульд суралцах хугацаандаа аюулгүй байдал, эрх зүйн шинжлэх ухааны эрдэмд суралцаж, эх оронч үзэлтэй, эрүүл чийрэг бие бялдартай, сэтгэл зүйн өндөр бэлтгэлтэй, хүний эрхийг дээдэлсэн, мэргэшсэн чадварлаг хууль сахиулагч, шударга үнэний дуу хоолой болон бэлтгэгдэж чадна гэдэгт итгэлтэй байна" гэв.

ДОТООД ХЭРГИЙН ИХ СУРГУУЛИЙН ШИНЭ ЭЛСЭГЧИД МОНГОЛ УЛСЫН ЦЭРГИЙН ТАНГАРАГ ӨРГӨЖ, СОНСОГЧ МӨРДӨС ЗҮҮХ ЁСЛОЛД ОРОЛЦЛОО