УИХ-ын Ёс зүй, дэгийн байнгын хорооны өнөөдрийн /2025.06.10/ хуралдаанаар Монгол Улсын Ёс зүйн хорооны 2024 оны тайлан, Хууль тогтоомжийн хэрэгжилтийг хангах талаар зарим арга хэмжээ авах тухай Байнгын хорооны тогтоолын төслийг хэлэлцэж, “Бүсчилсэн хөгжил-төрийн албаны манлайлал” сэдэвт төрийн албан хаагчийн зөвлөгөөн зохион байгуулсан талаарх Монгол Улсын Ёс зүйн хорооны мэдээллийг сонсов.

Хуралдаан Монгол Улсын Ёс зүйн хорооноос ирүүлсэн Төрийн албан хаагчийн ёс зүй, хууль тогтоомжийн хэрэгжилт болон ёс зүйн зөрчлийн нэгдсэн дүн төлөв байдлын 2024 оны тайланг эхлээд хэлэлцэв. Тус тайланг 2025 оны нэгдүгээр сарын 21-ний өдрийн Байнгын хорооны хурлаар хэлэлцэж эхэлсэн боловч УИХ-ын хяналт шалгалтын тухай хуулийн дагуу УИХ-ын Тамгын газрын Үнэлгээ, мониторингийн газрын дүн шинжилгээний тайланг ирэхээр үргэлжлүүлэн хэлэлцэж, шийдвэрийн төслөө батлахаар хойшлуулсан юм. Ёс зүйн хорооны тайлантай холбогдуулан УИХ-ын гишүүн Б.Хэрлэн, төрийн албан хаагчийн ёс зүйн зөрчлөөс урьдчилан сэргийлэх, соён гэгээрүүлэх үндэсний хөтөлбөрт тодорхой дүн шинжилгээ хийсэн эсэх талаар асуув.

Ажлын хэсгээс хариулахдаа, Төрийн албаны зөвлөл, Монгол Улсын Ёс зүйн хороо, УИХ-ын Төрийн байгуулалт, Ёс зүй, дэгийн байнгын хороо болон Засгийн газрын хэрэг эрхлэх газартай хамтраад “Бүсчилсэн хөгжил-төрийн албаны манлайлал” зөвлөгөөнийг зохион байгуулж, үүнд нийт 5 мянга гаруй төрийн албан хаагч оролцлоо. Зөвлөгөөнөөр Төрийн албаны ёс зүйн тухай хуулийн хэрэгжилтийн талаар нухацтай хэлэлцсэн. Төрийн албан хаагчид хуулийн талаарх мэдлэг, мэдээлэл сайн төдийгүй хуулийг хэрэгжүүлэх хүсэл эрмэлзэлтэй байна. Харин Ёс зүйн дэд хороодуудыг чадавхжуулах асуудлыг тэргүүн ээлжид авч үзэх ёстой юм байна. Энэ бүх үйл ажиллагаа соён гэгээрүүлэх үндэсний хөтөлбөртэй уялдаж байна. Зөвлөгөөний үеэр Засгийн газрын хэрэг эрхлэх газартай хамтраад хоёр шийдвэр гаргалаа. Нэгдүгээрт, бүх яам, агентлаг болон тухайн орон нутгийнхаа Засаг даргын тамгын газрын үйл ажиллагааны үнэлгээнд Ёс зүйн дэд хороод хөндлөнгийн үнэлгээ хийх журам тогтоосон. Хоёрдугаарт, Ёс зүйн дэд хороодын үйл ажиллагааг эрчимжүүлэх, шаардлагатай бол хууль тогтоомжид өөрчлөлт оруулах асуудлыг холбогдох Байнгын хороотойгоо хамтарч шийдүүлэхээр тогтсон гэв.

УИХ-ын гишүүн А.Ариунзаяа, Төрийн албаны зөвлөл төрийн албан хаагчдаа улс төрийн нөхцөл байдлаас шалтгаалан халаа, сэлгээнд өртөх байдлаас хамгаалах, жендэрийн эрх тэгш байдлыг хангахад санаачилгатай ажиллах тухай, УИХ-ын гишүүн Д.Рэгдэл төрийн албан хаагчийн ёс зүйн зөрчил гаргаж буй үндсэн шалтгааныг тогтоохгүй бол төрийн мэргэшсэн албан хаагч шатлан дэвших зарчмаараа ажиллах боломжгүй байгааг анхаарах талаар саналаа хэллээ. Ингээд Төрийн албан хаагчийн ёс зүйн хууль тогтоомжийн хэрэгжилт, төрийн албан хаагчийн ёс зүйн зөрчлийг нэгдсэн дүн төлөв байдлын талаарх Ёс зүйн хорооны 2024 оны тайланг хэлэлцээд Хууль тогтоомжийн хэрэгжилтийг хангах талаар зарим арга хэмжээ авах тухай Байнгын хорооны тогтоолын төслийг баталлаа.

Байнгын хорооны хуралдаан үргэлжлэн “Бүсчилсэн хөгжил-төрийн албаны манлайлал” сэдэвт төрийн албан хаагчийн зөвлөгөөн зохион байгуулсан талаарх Монгол Улсын Ёс зүйн хорооны мэдээллийг сонслоо.

Мэдээллийг Төрийн албаны зөвлөлийн гишүүн Ц.Амартөгс танилцуулав. Тэрбээр, энэхүү зөвлөгөөнөөр Төрийн албаны тухай хууль болон Төрийн албан хаагчийн ёс зүйн тухай хуулийн хэрэглээ, тулгамдаж байгаа асуудлуудыг хэлэлцэж, зарим шаардлагатай шийдвэрүүдийг гаргах талаар зөвлөлдлөө. Төрийн албан хаагчдын хувь хүний хөгжлийн агуулгаар мэдээлэл солилцох, илтгэл танилцуулах зэргээр олон талын агуулгатай үйл ажиллагааг зохион байгуулсан. Мөн ёс зүйн гомдлыг шийдвэрлэх үйл явцын талаар болон, соён, гэгээрүүлэх үйл ажиллагааг үр дүнтэй зохион байгуулах, Ёс зүйн дэд хороог чадавхжуулах, Төрийн албан хаагчийн ёс зүйн тухай хуульд заасан сахилгын зөрчлүүдийн ялгаа, ялгамж болон холбогдох хууль тогтоомжийг боловсронгуй болгох талаар санал солилцож, асуудал шийдэл дэвшүүлэн зөвлөлдлөө хэмээн танилцууллаа. Танилцуулагатай холбогдуулан Байнгын хорооны гишүүд асуулт асууж, хариулт авлаа.

ЁЗДБХ: Төрийн албан хаагчийн ёс зүй, хууль тогтоомжийн хэрэгжилт, ёс зүйн зөрчлийн төлөв байдлын тайланг хэлэлцэв