Улсын Их Хурлын Хүний эрхийн дэд хороо хуралдаж илтгэл танилцууллаа.

“Хүүхдийн эрх, хамгааллын талаарх мэдлэг, хандлага” хэсэгт хүүхдийн эрх, хамгааллын талаар хүүхэд, эцэг эх, олон нийтийн мэдлэг, хандлагын төлөв байдал, түүнээс үүдэн гарч буй хүүхдийн эсрэг хүчирхийллийн хэлбэрүүд, хүүхдийн эрхийн зөрчил гарч буй орчин зэрэг хүүхэд хамгааллын тулгамдаж буй зарим асуудлыг судалгаа, дүн шинжилгээний үр дүн, баримтад тулгуурлан авч үзсэн талаар тайлбарлалаа.

УИХ-ын гишүүн Д.Сарангэрэл, Н.Учрал, М.Оюунчимэг, Ж.Батзандан, О.Баасанхүү, Н.Оюундарь нар асуулт асууж, хариулт авч өөрсдийн байр сууриа илэрхийллээ.

Онцлох ишлэлүүдээс /Хүний эрхийн дэд хорооноос/

Өнгөрсөн онд 2-7 насны 298 хүүхэд бэлгийн хүчирхийлэлд өртжээ. Үүнээс 295 нь эмэгтэй, 3 нь эрэгтэй. Энэ бол зөвхөн цагдаад шалгагдсан хэрэг. Үүнээс 47 хувь нь хэрэгсэхгүй болгосон.
Хүчирхийлэлд өртсөн 298 хүүхдийн 18 нь төрсөн аавдаа, 49 нь хойд эцэгтээ хүчирхийлүүлсэн байна.
Дөрвөн настай хүүхэд хүчиндсэн хэрэг шалгагдаж байга бол нэг ой 5 сартай настай хүүхдийг хүчиндсэн хэрэг шүүхийн шатанд явж байна.
Бэлгийн хүчирхийлэлд өртсөн хүмүүсийн тоо нэмэгдэж байна. Хүчирхийлэгч нь голдуу төрөл садан байдаг.
Энэ оны байдлаар 12-17 насны 1613 эх төржээ. Мөн 20 хүртэл насны 1668 эх үр хүндүүлсэн байна. Энэ бол улсын эмнэлгийн тоо мэдээлэл. Хувийн эмнэлгийн талаар мэдээлэл байхгүй.
Охид эмэгтэйчүүд жирэмсэн хил давчихаад эргэж орж ирэхдээ хүүхдээ яасан нь мэдэгдэхгүй байна. Энэ нь хүүхдээ худалдаалж байгаа гэмт хэргийн шинжтэй байгаа юм. Иймээс хилээр нэвтэрч буй эмэгтэйчүүдийг жирэмсэн эсэхийг нь магадалж байх хэрэгтэй байна.
Сургуулийн нөхцөлд охидыг дарамталдаг. Үүнээс үзэхэд үндэсний аюулгүй байдлын хэмжээнд яригдахад хүрлээ.
Бага насны хүүхэд төрснөөс болоод амьдралд янз бүрийн асуудал гарч байна. Бэлгийн хүчирхийлэлд өртсөн хүүхэд нийгмийн амьдралаас ангид байна. Зарим сургууль дээр охидын үзлэг хийж, багш нарт мэдээлэл өгснөөс хүүхэд хохирч байна.
Охид амиа их хорлож байна. Өсвөр насны охидын асуудал зөвхөн тухайн охидынх бус нийгмийн асуудал болоод байна.

Нийгмийн бүлэг бүрт хүний эрхийн зөрчил байгааг сануулсаар байна