2020.08.20
С.Ганбаатар: Нийгэм, эдийн засгийн зөвшилцөл, түншлэлийн механизмыг тусгах хэрэгтэй
УИХ-ын ээлжит бус чуулганы өнөөдрийн \2020.08.20\ нэгдсэн хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэлийг батлах тухай тогтоолын төслийг хэлэлцэж байна.
“Монгол Улсыг 2021-2025 онд хөгжүүлэх таван жилийн үндсэн чиглэл” нь Үндэсний нэгдмэл үнэт зүйл, Хүний хөгжил, Амьдралын чанар ба дундаж давхарга, Эдийн засаг, Засаглал, Ногоон хөгжил, Амар тайван, аюулгүй нийгэм, Бүс, орон нутгийн хөгжил, Улаанбаатар ба дагуул хот гэсэн 9 бүлэг, 47 зорилттой. Энэ хүрээнд 2021-2025 онд хэрэгжүүлэх бодлогын зорилго, зорилт, хүрэх үр дүн, хэрэгжилтийн хяналт-шинжилгээ, үнэлгээний шалгуур үзүүлэлт, зорилтот түвшинг тодорхойлжээ.
Хэлэлцэж буй асуудалтай холбоотойгоор УИХ-ын гишүүд асуулт асуулаа.
УИХ-ын гишүүн С.Ганбаатар:
“Энэ бол маш чухал бодлогын баримт бичиг гэж үзэн, дэмжиж байна. Хэрэгжснээрээ жил бүр л тойрог тойрог руугаа чиглэсэн барилга барих асуудал багасах болов уу гэж харж байна. Орхон аймагтай холбоотой зүйлээ албан ёсоор бичгээр өгнө.
- Зураг төсөл, ТЭЗҮ гэсэн зүйл их орж иржээ. Олон жил 7 тэрбумаар спорт ордон барина гээд одоо 24 болоод сураг алдарсан тохиолдол ч бий. Энэ асуудлыг шийдэхэд хуучин арга барилаас шинэлэг ямар зарчмын заалтууд орсон бэ?
- Юуг хэнээр хэнтэй хийх вэ? Яаж хянуулах вэ гэдэг дээр анхаармаар байна. Өөрөө чадна гэхээс илүү биднээс илүү хэн чадах вэ гэдэг дээр Засгийн газар бодлогоо боловсруулж баймаар байна. Нийгэм эдийн засгийн зөвшилцөл, түншлэлийн механизм гэдэг үг л энд орж ирэхгүй байна. Баримт бичгээс харагдсангүй. 5.5 дээр хагас дутуу байна. Ухаалаг бүтэц гэдэг дотор оруулах томьёолол байж болох уу? Улсын 3 талт хэлэлцээр гэсэн механизм бидэнд бий. Түүн дээр тогтмол хяналт тавьдаг МҮХАҮТ, МАОЭХ, ҮЭ, Иргэний нийгмийн байгууллага нь оролцдог байх нь зүйтэй. Сингапур ингэж хөгжсөн.
- Орон нутгийн өөрийн удирдлага гэдэг зүйл манайд үндсэндээ дампуурч байгаа. Хэдэн дарга нар би мэднэ гээд давхиад байдаг. Аймаг дүүрэгт бизнес эрхлэгч ард иргэдийн төлөөлөл оролцож хянадаг зүйл байхгүй учраас ХЭГ-ын дарга сайд нь бүгдийг хянаж чаддаггүй. Эдгээр саналуудыг оруулах боломж байна уу?”
Түүний асуултад УИХ-ын гишүүн, Эдийн засгийн байнгын хорооны дарга Ж.Ганбаатар, ЗГХЭГ-ын дарга Л.Оюун-Эрдэнэ нар хариуллаа.
