Өнгөрсөн хаврын чуулганаар БСШУС-ын байнгын хорооноос Соёлын тухай, Кино урлагийг дэмжих тухай хуульд онцгой анхаарал хандуулан батлуулж чадсан. Үүгээр ч зогсохгүй Г.Дамдинням гишүүний даргалж буй тус хороо өнгөрсөн хаврын чуулганаар долоон удаа хуралдаж, 18 асуудал хэлэлцэж, эрхлэх асуудлынхаа хүрээнд 15 хууль, хоёр УИХ-ын тогтоол хэлэлцэж батлуулсан юм.

Харин энэ намрын чуулганаар БСШУС-ын байнгын хороонд харьяалагдах хэд хэдэн чухал хуулиуд хэлэлцэгдэнэ. Намрын чуулганы хамгийн том реформын шинжтэй хууль бол Боловсролын багц хууль гэж тус байнгын хорооны дарга Г.Дамдинням гишүүн онцолж байгаа.

Тэрээр боловсролын салбарт шинэчлэл тасралтгүй хийгдэж байх ёстой. Энэ салбарын юу нь болж, юу нь болохгүй байна, төгсөж гарч байгаа залуус олон улсад өрсөлдөх чадвартай болж чадаж байгаа эсэхэд онцгой анхаарч, шинэчлэл хийх ёстой гэж байр сууриа илэрхийлээд байгаа.

Ээлжит намрын чуулганы хамгийн том реформын шинжтэй хуульд зүй ёсоор тооцогдож байгаа Боловсролын багц хуульд энэ удаа өөрчлөлт оруулахдаа УИХ-ын түүхэнд байгаагүй хамгийн том ажлын хэсэг байгуулагдсан. Долоон салбар хуулийн ажлын хэсэг байгуулагдаж, 23 гишүүн энэ хуулиудын ажлын хэсэгт орж ажиллаж байна. Түүнчлэн өмнө нь боловсролын хуульд өөрчлөлт оруулахдаа Дээд боловсролын, Сургуулийн өмнөх боловсролын тухай хуулийн төсөл гэх мэт тус тусад нь оруулж ирдэг байсан. Харин энэ удаад Боловсролын хуулийг цогцоор нь харж, шинэчлэл хийх гэж байгаа нь нэг том давуу тал болж байна.

Мөн Монголдоо боловсрол эзэмшсэн хүүхэд, залуучууд дэлхийд өрсөлдөх чадвартай байх ёстой. Нөгөө талаас ирээдүйн иргэдийг бэлдэж байгаа багш нарын цалин хөлс, нийгмийн баталгаа тодорхой байх хэрэгтэй. Хэн сайн ажиллаж байна, тэр хүн өндөр цалин хөлс авдаг системд шилжих цаг болсон. Энэ талаарх эрх зүйн зохицуулалт болон бусад олон асуудлыг боловсронгуй болгохоор дээрх хуулийн төсөл дээр ажиллаж байгаа ажлын хэсгийнхэн ажиллаж байна.

Харин Г.Дамдинням гишүүний хувьд дараах 6 өөрчлөлтийг онцлоод байна.

Хөгжлийн хэрэгцээ шаардлагад нийцсэн боловсролын зорилго тодорхой болох
Суралцахаас суралцахуй руу чиглэсэн дэлхий нийтийн хандлагын өөрчлөлттэй хөл нийлүүлэх
Боловсролын удирдлагын тогтолцоонд шинэчлэл хийх
Боловсролын цахим шилжилт цахим боловсрол, зайны сургалтыг хүссэн хүн бүр хил хязгааргүй чанартай сургалт авах
Боловсролын чанар, үр дүн, гүйцэтгэлд чиглэсэн санхүүжилт буюу үр дүнтэй хийснээр цалинждаг системд шилжих.
Чанарын баталгаажуулалт болон магадлан итгэмжлэлийг чанаржуулах. ОУ-ын үнэлгээний системтэй болох шаардлагатай.

Түүнчлэн тэрээр намрын чуулганы гол зорилго болох реформын шинжтэй энэхүү хууль нь Монголын айл өрх бүрт хамааралтай хууль эрхзүйн өөрчлөлт байх болно. Хуулийн төсөлд зарчмын зөрүүтэй санал өгөх эсхүл өөр санал, хувилбар байвал lawforum.parliament.mn, lawmaker.parliament.mn цахим системд илгээх боломжтой гэдгийг иргэддээ уриалаад байна.

Г.Дамдинням: Намрын чуулганы хамгийн том реформын шинжтэй хууль бол Боловсролын багц хууль