УУХҮ-ийн сайд Ж.Ганбаатар цаг үеийн асуудлаар мэдээлэл өгч, сэтгүүлчдийн асуултад хариуллаа.

-Цар тахлын сүүлийн хоёр жилийн хугацаанд нүүрсээр хийх төлөлт өндөр байгаа. Эдийн засагчид ч үүнийг хүндрэлтэй гэж харж байна. Ерөнхийлөгч БНХАУ-д айлчлал хийж байгаа учир энэ асуудал нааштайгаар шийдвэрлэгдэх байх гэсэн найдлага бий. Газрын ховор элементийг эргэлтэд оруулах чиглэлд ямар бодлого баримтлах вэ?

-Манай улсад илрүүлсэн нь дандаа социализмын үеийн ордууд байгаа. Цаашид технологи ашиглан хайх боломж нь байна. Япон, Солонгос, Герман, АНУ бүгд манай улсын газрын ховор элементийг сонирхож байгаа. Салбарын сайдын хувьд БНСУ-тай хамтрах ажлыг ахалж байна. Манай яамны ТБНД, ЗГХЭГ-ын дарга Д.Амарбаясгалангийн хамт саяхан энэ асуудлаар БНСУ-д ажиллаад ирсэн. БНСУ энэ чиглэлд сайн технологитой.

-Ирэх онд 36 сая тонн нүүрс экспортлох бүрэн боломжтой юу?

-Манай уул уурхайн салбар нүүрс 36 сая битгий хэл 70, 80 саяыг ч гаргаж чадна. Тээвэрлэлт болон хилийн боомт, экспортолж буй улсын дотоод асуудлуудаас л шалтгаална. Боомтын сайдтайгаа хамтраад (Удахгүй томилогдох байх) БНХАУ-ын гангийн үйлдвэрийн захирлуудтай уулзах төлөвлөгөөтэй байна. Тухайлсан, яг ажил хийдэг хүмүүстэй нь тулж ажиллах бодолтой. “Тэг ковид” бодлого сулрахыг хүлээж буй зүйл ч байна.

-АМНАТ давхардуулж авдаг асуудлыг хэрхэх вэ?

-АМНАТ-ын тухайд хариулах субъект нь Сангийн сайд. Яг ямар аргачлалын хүрээнд, ямар хуулийн зохицуулалтыг ашиглан АМНАТ давхардуулж авч байгааг нь Сангийн яам тайлбарлах ёстой байх. Гадаадын хөрөнгө оруулалт орж ирэхгүй байгаа том шалтгааныг зэсийн роялти гэж харж байгаа. Үүнийг бас Сангийн яам сонин аргачлалаар бодоод байгаа.

-Газрын тосны үйлдвэр хэзээ ашиглалтад орох вэ?

-БНЭУ-ын зээлээр хэрэгжиж буй. Нөөцийн хайгуулын асуудлыг ЗГ-ын хуралдаанаа Шадар сайд С.Амарсайхан хоёр асуудлыг оруулж, шийдвэрлүүлэсний нэг нь энэ байсан. Цар тахалтай холбоотой асуудлаар удаашрал бий. Гэхдээ ажил дорвитой урагшилж байгааг та бүхэн харж байгаа байх.

Ж.Ганбаатар: Манай улс 70, 80 сая тонн нүүрс экспортлох бүрэн чадалтай