УИХ-ын чуулганы өнөөдрийн \2023.01.06\ нэгдсэн хуралдаанаар Монгол Улсын төрийн цахим шилжилтийн өнөөгийн байдал, цаашдын зорилтуудын талаарх мэдээллийг сонслоо. 

Уг асуудалтай холбогдуулан гишүүд асуулт асуув.

УИХ-ын гишүүн Ц.Идэрбат:

Сонирхсон асуултаа ирүүлэх бололцоог УИХ-ын цахим хуудсанд 5 хоногийн өмнө байршуулах хуулийн зохицуулалттай. Үүний дагуу Засгийн газрын өнөөдрийн мэдээлэлтэй холбогдуулаад иргэдээс 6 асуулт ирсэн байна. Би багцалж асууя.

Нэгдүгээрт иргэн Батбаяраас манай улсад хамгийн сайн цахимжсан салбар аль вэ. Мөн цахимжаагүй салбар аль вэ. Яагаад гэсэн асуултыг ирүүлсэн байна.

Хоёрдугаарт иргэн Баттулгаас хөдөөгийн иргэдийг аймаг, нийслэл рүү эмнэлгийн тусламж, үйлчилгээ авахаар очиход 13А маягт нэхэх юм. Цахим үндэстэн болж байгаа биз дээ.

Гуравдугаарт иргэн Лхаасүрэн цахим систем бол төрийн хулгайгүй болох ганц чухал зүйл. Төрийн бүх байгууллагын мөнгөн гүйлгээг ил болгох хэрэгтэй гэжээ.

Түүний асуултад УИХ-ын гишүүн, ЦХХХЯ-ны сайд Н.Учрал хариуллаа.

УИХ-ын гишүүн Ц.Идэрбат:

Сарын өмнө төрийн үйлчилгээг иргэд өөрийнхөө мэдээллийг аваад төрийн болон хувийн хэвшлийн бүх л хэлбэрээр үйлчлүүлэхэд нотариатаар батлуулах шаардлагагүй болоод 74 нэр төрлийн бичиг баримт гэх зүйлийг хэлж байсан. Гэтэл 2023 оны 01-дүгээр сарын 02-ны өдөр 25-р телевизийн мэдээллийн хөтөлбөрөөр дээрх зүйл хэрэгжихгүй байна. Ард иргэдийг арилжааны банк дээр очиход нөгөө л иргэний үнэмлэхээ, нийгмийн даатгалын дэвтрээ нотариатаар батлуулаад ир гэсэн шаардлага байна гэж мэдээлсэн. Үүн дээр ямар тайлбар хийх вэ? Үнэхээр бидний ярьж байгаа зүйл амьдрал дээр буухгүй байна уу.

Харилцааны холбооны салбар зөвхөн хоёр хүн хоорондоо холбогдох салбар биш болсон. Энэ бол дэлхийтэй холбогдох, банк санхүү, мэдээллийн хэрэгсэл гээд олон зүйлүүдтэй холбоотой. Монгол улсын газар зүйн нөхцөл байдал, тархай, бутархай байдаг хүчин зүйлүүдээс болоод үүрэн холбоонд хөдөөгийн багуудыг холбох асуудал сүүлийн үед эрчтэй яригдаж буй.

Иргэд ч мөн үүнийг хүсэж, шаардаж байгаа. Учир нь малчин гэхээрээ бүх зүйлээс алслагдсан байхыг хүсэхгүй байна. Үүн дээр гол зохицуулалт хийдэг бүх нийтийн үйлчилгээний үүргийн сан гэж бий. Яг энэ үүргийн сангийн санхүүжилтээр явбал хэдэн жилд хөдөөгийн багуудыг үүрэн холбооны сүлжээнд холбох боломжтой вэ? Цаашдаа Монгол улсын 1600 гаруй, яг алслагдсан 1200  гаруй багуудыг яаж үүрэн холбооны сүлжээнд холбох вэ. Хэтийн ямар төлөвлөгөө байна вэ?

Түүний асуултад УИХ-ын гишүүн, ЦХХХЯ-ны сайд Н.Учрал хариуллаа.