АГААРЫН БОХИРДЛЫГ БУУРУУЛАХ ХҮРЭЭНД УТААНЫ АСУУДЛААРХ БОДЛОГО, ШИЙДВЭРИЙН ХЭРЭГЖИЛТИЙН ҮР ДҮН, ШИЙДЭЛ ЕРӨНХИЙ ХЯНАЛТЫН СОНСГОЛ БОЛЛОО. 

Уг сонсголын хүрээнд УИХ-ын гишүүн С.Эрдэнэболд Эрүүл мэндийн яамны Төрийн нарийн бичгийн дарга Д.Очирбатаас асуулт асууж, хариулт авлаа.

УИХ-ын гишүүн С.Эрдэнэболд: 

Нэгдүгээрт, Үндсэн хуулийн 2 дугаар бүлгийн 19 дүгээр зүйл дээр төр иргэнийхээ эрх ашгийг хамгаалах үүрэгтэй. Тэгэхдээ төрийн үйлдэл буюу хийсэн шийд, гаргасан шийдвэрүүд, эс үйлдэл буюу гаргаж чадаагүй шийдвэрүүдийн төлөө Монгол Улсын иргэн амь нас эрүүл мэндээрээ хохирсон тохиолдолд Монгол төр уучлал гуйх ёстой. Уучлал гуйгаад зогсохгүй анагаахын хэллэгээр цохилтын тунгаар яаралтай арга хэмжээ авах ёстой гэж үзэж байгаа. Номер нэг зүйл нь түр хороог байгуулах ёстой. Парламентаас түр хороо байгуулаад тэр нь мөрдөн шалгах чиг үүргийг багтаасан байх ёстой. Өнгөрсөн хугацаанд хариуцлагын асуудлыг огт гээгдүүлж болохгүй. Жишээлбэл, зүрхний эмч Б.Болдсайхан гуайн нэг олон нийтэд хандсан мэдээлэл дээр 1990 оноос хойших Монгол Улсын иргэдийн үр хөндөлтийг асар өндөр тоо гэж бичсэн байсан. Ойролцоогоор 900 мянга. Үүншиг 2011, 2012 оны эхний саруудад үр зулбаж байгаа буюу амь насаа алдаж байгаа хүмүүсийн тоо, цаашдаа энийг шийдэж чадахгүй бол хэчнээн хэмжээнд жил тутам ямар хүмүүс төрөх ёстой байсан талаарх тоо, статистикуудыг гаргах ёстой.

Хоёрдугаарт, ЭМЯ-наас гаргаж байгаа амь хохирогчдын тоог 200 хүрэхгүй дүнтэй хэлээд байдаг. Сая зарим хүмүүсийн хэлж буйгаар 720 гэсэн тоо хэлээд байдаг. Энэ хоёр их зөрүүтэй байна. ЭМЯ руу чиглэж байгаа асуулт нь таны илтгэл дээр бол эрүүл мэндийн төсөв 3% хүрэхгүй буюу 2,7-2,9%-ийн хооронд хэлбэлзээд байгаа. Цаашлаад олон улсын жишиг 6% руу очих ёстой гээд байгаа. Тэгэхээр энийг ямар үе шаттайгаар нэмэх вэ? Эрүүл мэнд бол зөвхөн тухайн салбарын асуудал бус үндэсний аюулгүй байдлын хэмжээнд яригдах асар том асуудал болчихсон!

Сэтгүүлч

Сэтгүүлч Б.Хонгорсайхан