Өндөрхаан-Чойбалсан чиглэлийн Улаанбаатар хотоос 394-440 дэх 50 м хатуу хучилттай авто замын ажил чанар стандартын шаардлага хангаагүйн улмаас эвдрэл, гэмтэл ихээр үүсэж зам, тээврийн осол олноор гарч иргэд, зорчигч, жолооч нарын амь нас, эрүүл мэнд, эд хөрөнгөд ноцтой хохирол учирсаар 10 гаран жилийн нүүрийг үзжээ.

Тодруулбал, 2013 онд Зам, тээврийн яам Улсын төсөв, Хөгжлийн банкны санхүүжилтээр үүний 50 км замыг Чайна Гео Инженеринг, 27-г нь "Хансуун зам" ХХК-аар гүйцэтгэлийн ажлыг хийлгүүлэх гэрээ байгуулж байв. Гэвч Улсын комисс байнгын ашиглалтад аваагүй шалтгаанаар замын урсгал засвар, арчлалтыг хийхгүй явсаар олон хүний амь насыг авч одоход хүргэсэн юм.

Энэ асуудлыг УИХ-ын гишүүн М.Бадамсүрэн Дорнод аймгийн Засаг даргаар ажиллаж байхдаа энэ төсөлт ажлыг үр дүнгүй болгосон бүх шатны албан тушаалтнуудад хариуцлага тооцож, хохирлыг барагдуулах асуудлыг удаа дараа хууль, хяналтын байгууллагуудад хандсаар ирсэн байдаг.

Хууль, тогтоомжийн дагуу Улсын чанартай энэ замын засвар арчлалтыг Зам, тээврийн яам хариуцдаг.

Улмаар 2024 онд Зам, тээврийн яам, харьяа байгууллагуудаас дээрх замуудын эвдрэл, гэмтэлд хэмжилт тооцоолол хийж, их засвар, шинэчлэлт хийх тухай дүгнэлт гарсны үндсэн дээр УИХ Улсын төсвөөр хэрэгжүүлэхээр шийдвэрлэсэн билээ.

Монголын төрөөс Зүүн бүсийн иргэд, тэр дундаа Дорнодчуудын олон жилийн турш шаардсан ирсэн Өндөрхаан-Чойбалсан чиглэлийн эвдэртэй 50 км замыг шинэчлэх ажил хэрэгжиж эхлэх нь.

Зам тээврийн яам Шандун Лүчиао компанитай өнгөрөгч долдугаар сарын 29-ний өдөр гэрээ байгуулж уг төслийг 2025-2027 онд хийхээр төлөвлөөд байна.

Дорнод аймгаас сонгогдсон УИХ-ын гишүүн М.Бадамсүрэн "Зүүн бүсээс сонгогдсон УИХ-ын гишүүд бид УИХ-аас батлан хэрэгжүүлж буй тус замын ажлын хэрэгжилтэд захиалагчийн болон техник технологийн хяналт хэрхэн тавьж буйтай танилцаж, тухай бүр иргэддээ мэдээлж ажиллах болно. Олон иргэний амь нас, эд хөрөнгөд ноцтой хохирол учруулсан энэ замыг шинэчлэхээр болж буй нь сайн хэдий ч 2013-2014 онд чанаргүй гүйцэтгэсэн компани болон санхүүжилтийг олгосон Зам, тээврийн яам, холбогдох байгууллагын албан тушаалтанд хуулийн хариуцлага тооцуулах бидний удаа дараагийн хүсэлт шийдвэрлэгдээгүйд харин туйлын харамсалтай байна" гэв.

М.Бадамсүрэн: Монголын төрөөс олон жилийн турш шаардсан "Тамын 50" буюу Өндөрхаан-Чойбалсан чиглэлийн зам шинэчлэлийн ажил эхлэхээр боллоо