Монгол Улсын Засгийн газраас 2017 оны 4 дугаар сарын 28-нд Эдийн засаг, нийгмийг 2018 онд хөгжүүлэх үндсэн чиглэлийг батлах тухай УИХ-ын тогтоолын төслийг өргөн барьсан юм.

2016 онд төлөвлөсөн арга хэмжээ 61,2 хувьтай биелжээ

Тогтоолын төслийг өргөн барихын хамт 2016 оны үндсэн чиглэлийн биелэлтийг тайлагнажээ. 2016 оны жилийн эцсийн байдлаар 5 цогц бодлогын хүрээнд 22 зорилт, 158 арга хэмжээ хэрэгжүүлэхээр төлөвлөснөөс биелэлт 61,2 хувьтай байна. Нийт 158 арга хэмжээг санхүүжүүлэхэд 3 их наяд 839,8 тэрбум төгрөг шаардлагатай гэж төлөвлөсөн бөгөөд 19 нь 100 хувь биелж, 62 нь 70-90 хувь, 68 нь 50 ба түүнээс доош хувийн биелэлттэй, 7 арга хэмжээ огт биелээгүй аж.

2017 онд эдийн засаг, нийгмийн хөгжүүлэх үндсэн чиглэл 2016 оны 11 дүгээр сарын 24-нд батлагдан хэрэгжүүлж байна. Нийт 5 бүлэг, 17 зорилт, 104 бодлогын арга хэмжээг нийтдээ 5.3 их наяд төгрөгөөр санхүүжүүлэхээр тогтоолд тусгажээ. Үүнээс улсын төсвийн хөрөнгөөр 327,6 тэрбум, гадаад эх үүсвэрээс 825,2 тэрбум, төр хувийн хэвшлийн түншлэл болон хувийн хөрөнгө оруулалтаар 4,1 их наяд төгрөгөөр тус тус санхүүжүүлэхээр төлөвлөн тусгажээ.

2018 онд өмнөх жилүүдтэй харьцуулахад төр, хувийн хэвшлийн түншлэл идэвхжинэ

2018 онд эдийн засаг, нийгмийг хөгжүүлэх үндсэн чиглэл УИХ-ын тогтоолын төслийн хавсралтад нийт 5 бүлэг 18 зорилт, 99 бодлогын арга хэмжээ авч хэрэгжүүлэхээр тусгасан байна. Эдгээр арга хэмжээг хэрэгжүүлэхэд нийт 7 их наяд 311,4 тэрбум төгрөг хэрэгтэй гэж тооцжээ. Үүнд, улсын төсвийн хөрөнгөөр 318,1 тэрбум, гадаад эх үүсвэрээс 1 их наяд 541,4 тэрбум, төр хувийн хэвшлийн түншлэл болон хувийн хөрөнгө оруулалтаар 5 их наяд 436,4 тэрбум төгрөгөөр тус тус санхүүжүүлэх юм.

2018 онд ДНБ-ий бодит өсөлт 1,8 хувь, ажилгүйдэл 8 хувиас ихгүй, инфляци 6,1 хувь, нэгдсэн төсвийн алдагдлын ДНБ-д эзлэх хэмжээ 9,5 хувьд байна гэж тогтоолын төслийн хавсралтад тусгажээ.

Бодит өсөлтийг хангах салбаруудын нэг болох хөдөө аж ахуйн салбарт 50 орчим тоо толгой малыг вакцинжуулалт хамруулж, 50 иргэн, аж ахуйн нэгжид хөнгөлөлттэй зээл авах боломж бүрдэнэ. Отрын бүс нутгийн судалгаанд 35 мянган га талбайг хамруулж, зоорийн багтаамжийг 7000 тн-оор, усалгаатай талбайг 3000 га-гаар нэмнэ.

Геологи, уул уурхай, хүнд үйлдвэрийг хөгжүүлэх

Оюу толгойн далд уурхайн бүтээн байгуулалт /45 хувьд хүрнэ/

Тавантолгойн орд ашиглах болон хөрөнгө оруулалтын гэрээний дагуу хэрэгжүүлэх ажил /20 хувьтай байна.

Гацууртын төслийг хэрэгжүүлж эхэлнэ. /Хэрэгжилтийг 100 хувь гэж үзвэл 2018 онд 20 хувийг хийнэ./

Газрын тос боловсруулах, нүүрс угаах, гүн боловсруулах үйлдвэр барих ажлыг эхлүүлнэ.

Зэсийн баяжмал хайлуулах, цэвэршүүлэх үйлдвэрийн ТЭЗҮ, нарийвчилсан зураг төслийг 100 хувь боловсруулж дуусгана.

Зарим цахилгаан станцыг өргөтгөх ажил дуусч, шинээр хэд хэдэн цахилгаан станцын ажил эхэлнэ

Дархан, Эрдэнэтийн дулааны цахилгааан станцын хүчин чадлыг 35 МВт-аар өргөтгөх ажлыг 100 хувь хийж гүйцэтгэнэ. Мөн Улаанбаатар-Мандалговь, Багануур-Өндөрхаан-Чойбалсангийн хоёр хэлхээт цахилгаан эрчим хүчний дамжуулалт, дэд станцын барилгын ажлыг дуусгана.

III цахилгаан станц, Чойбалсангийн дулааны цахилгаан станцын хүчин чадлыг өргөтгөх ажил эхлүүлнэ. Мөн Тавантолгойн 450 МВт-ын цахилгаан станцын барилгын ажлыг үргэлжлүүлнэ. Эрдэнэбүрэн, Эгийн гол, Баруун бсүийн усан цахилгаан станцын барилгын ажлыг эхэлнэ.

2018 онд 486 км хатуу хучилттай авто замыг ашиглалтад оруулна

2018 онд Нарийнсухайт-Шивээхүрэн чиглэлийн төмөр замын барилгын ажил дуусч, ашиглалтад орно. Мөн Ховд, Дорнод, Өмнөговь аймгийн нисэх буудлыг өргөтгөх ажил дуусна.

Замын-Үүдийн тээвэр логистикийн төв байгуулах ажил шувтарч, Тавантолгой-Гашуун сухайт чиглэлийн төмөр замын барилгын ажил дуусах шатандаа орно.

Баянзүрх, Сонсголон, Яармагийн гүүр, Хөөт-Бичигт, Зүүнбаян-Ханги, Эрдэнэт-Овоот чиглэлийн төмөр зам, Хөшигийн хөндийн тээвэр, логистикийн төв, Хэнтий аймгийн нисэх буудлыг өргөтгөх ажлууд ирэх жил эхэлнэ.

Улаанбаатар хотын шинэ цэвэрлэх байгууламж 2018 онд ашиглалтад орно

Дөрвөн аймгийн цэвэрлэх байгууламжийн барилга угсралтын ажил ид өрнөж, Улаанбаатар хотын цэвэрлэх байгууламжийн барилгын ажил дуусч ашиглалтад орно.

Барилгын гангийн үйлдвэр барьж дуусган, аюултай хог хаягдлыг устгах байгууламжийн ТЭЗҮ-ийг боловсруулна. Цахилгааны урамшуулал болон хөнгөлөлттэй үнээр сайжруулах зуух, боловсруулсан түлшийг 40 000-аас багагүй өрхөд олгоно.

2018 онд 600 мянгаас багагүй га талбайг тусгай хамгаалалтад авч, 5000 га-гаас багагүй талбайд ойжуулалт, нөхөн сэргийлт хийнэ. 30 мянга га ойд цэвэрлэгээ хийж, 100 булаг, шандыг төр хамгаалалтдаа авна. Шинээр 3 хөв, цөөрөм байгуулж, 150 мянган га-д хөнөөлт шавж устана.

Улаанбаатар болон Хэнтий аймагт барих аялал жуулчлалын цогцолбор төвийн ТЭЗҮ, зураг төсөл боловсруулах ажлыг 100 хувь дуусгана.

Шинээр 10 000 ажлын байр бий болгоно

100 000 амьд төрөлтөд эхийн эндэгдлийн түвшин 27, 1 000 амьд төрөлтөд нялхсын эндэгдлийн түвшин 13,7 байна гэж тооцоолжээ. Ирэх онд хөгжлийн бэрхшээлтэй иргэдэд зориулсан 6 хөгжлийн төвийн байгуулж, хөдөлмөр эрхлэлтийг дэмжих сангаас зээл авах бичил аж ахуйн нэгж, иргэдийн тоог 7000-д хүргэж, шинээр 10 000 ажлын байр бий болгоно.

Гэмт хэрэг, ослоос урьдчилан сэргийлэх зорилгоор орон нутгийн замд 27 хяналтын цэг байгуулж, шүүх эмнэлгийн хоёр шинэ байрыг ашиглалтад оруулна. Замын үүд-Эрээний чөлөөт бүс байгуулах ажлыг 50 хувьд хүргэнэ.

99 төсөл, арга хэмжээ санхүүжүүлэхэд 7,3 их наяд төгрөг хэрэгтэй