УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаанаар /2017.05.10/ Монгол Улсын эдийн засаг, нийгмийг 2016 онд хөгжүүлэх үндсэн чиглэлийн биелэлт УИХ-ын тогтоолын төслийг хэлэлцэж байна. Энэ үеэр УИХ-ын гишүүн Ц.Цогзолмаа эрүүл мэндийн салбарын асуудлыг хөндлөө.

УИХ-ын гишүүн Ц.Цогзолмаа: 2016 оны жилийн эцсийн байдлаар Монгол Улсын Засгийн газар 5 цогц бодлогын хүрээнд 22 зорилт, 158 арга хэмжээ хэрэгжүүлэхээр төлөвлөснөөс дунджаар 61,2 хувьтай биелжээ. Тэр дундаа Нийгмийн хамгааллын салбарын зорилт 61,2 хувьтай, эрүүл мэндийн салбарын зорилт 90 орчим хувьтай, боловсролын салбар 71,1 хувийн биелэлттэй байна гэж тогтоолын төслийн хавсралтад дурдсан байна.

Аудитын байгууллагын дүгнэлтээр бол нийгэм, эдийн засгийн үндсэн чиглэлийн биелэлт дунджаар 58,9 хувь буюу 60 хувьд хүрэхгүй байна. Биелэлтийн хувь хамгийн өндөр байгаа эрүүл мэндийн салбарыг онцолж асуухад салбарын зорилт сайн биелсэн гэдэг нь бодит байдалтай хэр нийцэж байна?

Тоон үзүүлэлтээр бол эрүүл мэндийн тусламж үйлчилгээний чанар, хүртээмжид мэдэгдэхүйц ахиц гарсан байх ёстой доо. Ц.Цогзолмаа

Эрүүл мэндийн яамны Төрийн нарийн бичгийн дарга Д.Очирбат: Өнгөрвөн дөрвөн жилд Эрүүл мэндийн яамны бодлого, зохион байгуулалт нь удирдлагын түвшинд хүнд байсан. Нэг жилийн дотор дөрвөн сайд, дөрвөн төрийн нарийн бичгийн даргатай солигдож, түүнийгээ дагаад бүтэц, зохион байгуулалтын хувьд ч тогтворгүй байлаа.

Гэхдээ эрүүл мэндийн салбарын эмч, мэргэжилтнүүд өдөр, шөнийн нойр, хоолыг умартан хүн амын эрүүл мэндийг сахин хамгаалах үйлсэд зүтгэсээр ирсэн.

Эрүүл мэндийн салбарын зорилт хангалттай түвшинд биелж, тусламж, үйлчилгээний чанарт ахиц гарсан гэж үзэж байна. Д.Очирбат

Эрүүл мэндийн салбарын зорилт 90 хувь биелсэн гэдэг хэр бодитой вэ?