Дэлхийн 187 улс жил бүрийн 11 дүгээр сарын 25-наас 12 дугаар сарын 10-ны өдрүүдэд “Жендэрт суурилсан хүчирхийлэлтэй тэмцэх 16 хоногийн аян”-ыг нэгдмэл зорилго, нэг уриан дор тэмдэглэдэг билээ. Охид, эмэгтэйчүүдийн эсрэг хүчирхийллийг таслан зогсооход олон нийтийг татан оролцуулах, жендэрт суурилсан хүчирхийллийн талаархи мэдлэг, ойлголт түгээх зорилготой энэ аянд Монгол Улс 1997 онд нэгдэн орсон юм.

2020 онд дэлхий даяараа “Өрх гэр, ажлын байр, олон нийтийн газарт: ЯГ ОДОО жендэрт суурилсан хүчирхийллийг цэглэе!” уриан дор нэгдэж хүчирхийллийн эсрэг нийгэм тэр чигээрээ дуугарах, хүн бүр үйлдэл хийхийг уриалан, сануулж байна.

Цар тахлын хүнд нөхцөлд иргэдийн дунд бухимдал нэмэгдэж, хатуу хөл хорио тогтоосонтой холбоотойгоор өнгөрсөн гурван сарын хугацаанд гэр бүлийн хүчирхийлэл нэмэгдсэн тухай хэлсэн бөгөөд 2020 оны 11 сарын 29-ний байдлаар Цагдаагийн байгууллагын 102 дугаарт гэр бүлийн хүчирхийллийн 48 дуудлага бүртгэгдсэн байна. Иймд хөл хорионы үеийг хүчирхийллийн айдастай орчинд биш, гэр бүлээрээ амьд харилцаа үүсгэж, хамтдаа хөгжиж, аз жаргалтай, инээд баяслаар дүүрэн өнгөрүүлэхийг Ерөнхий сайд иргэдэд уриалсан.

УИХ-ын гишүүн Б.Баярсайхан бусад гишүүдийн хамтаар УИХ дахь хүчирхийллийн эсрэг лобби бүлэг байгуулан ажиллаж байгаа билээ. Уг лобби бүлэг ЯГ ОДОО аянд нэгдэж, өрх гэр, ажлын байр, олон нийтийн газарт хүчирхийлэл айдасгүй, амар амгалан орчинг бий болгохын төлөө олон нийтэд хандсан санаачилга, мэдлэг мэдээлэл түгээх нөлөөллийн ажлыг цахим орчинд зохион байгуулж байна.

Энэ тухайгаа УИХ-ын гишүүн, УИХ дахь хүчирхийллийн эсрэг лобби бүлгийн ахлагч Б.Баярсайхан өөрийн цахим хуудастаа,

“Жендэр гэдэг нь эрэгтэй, эмэгтэйчүүдийн нийгэмд эзлэх байр суурь, тэдний үүрэг, хүлээх хариуцлагыг тухайн нийгмийн бүтэц, түүх болон соёлоор дамжуулан “бий болгож бүтээсэн” ойлголтыг хэлдэг. Монголын түүх, соёлоос улбаатайгаар эрэгтэй болон эмэгтэй хүний онцлог, ялгаатай байдал, ялгаатай хэрэгцээг давуу эсвэл хохируулсан байдлаар хандах аливаа жендэрийн хэвшмэл ойлголтыг бид ҮЛ ТЭВЧИНЭ!

Эмэгтэй хүн үс урт, ухаан богино, оргүйгээс охинтой нь дээр гэх мэтчилэн амны уншлага болсон үг хэллэгээр дамжуулан охид, бүсгүйчүүдийн нэр төр, эрхэм чанарыг үгүйсгэхийг бид ҮЛ ТЭВЧИНЭ!

Эр хүн уйлдаггүй эсвэл эр хүнд итгэхээс эрхий хуруундаа итгэ гэх мэт хэллэгээр дамжуулан эрчүүдийн сэтгэл хөдлөл, мэдрэмжийг хөгжүүлэхийг хязгаарлах, эрчүүдтэй харилцах харилцааны итгэлцлийг бууруулах хандлагыг бий болгох, улмаар эдгээр хэллэгээр дамжуулан “бүтээж”, “хэвшүүлж” байгаа жендэрийн хэвшмэл ойлголтыг бид өөрчилснөөр жендэрт суурилсан хүчирхийллийг зогсоож чадна. Бид “уйлдаг”, “мэдрэмжтэй” эрчүүдийг хөгжүүлэх, төлөвшүүлэх шинэ хэвшмэл ойлголтыг ЯГ ОДОО хэвшүүлцгээе!” хэмээн уриалжээ.

УИХ дахь хүчирхийллийн эсрэг лобби бүлэг Хүчирхийллийн эсрэг #ЯГ ОДОО аянд нэгдлээ