Оюутолгой төсөл нь анх батлуулсан байгаль орчны нарийвчилсан үнэлгээ, байгаль орчны менежментийн төлөвлөгөөний дагуу говийн бүсийн газрын гүний усыг ашиглаж байгаа талаар хяналт тавих ажлын хэсгийн өргөтгөсөн хурал эхэллээ.

Уг хуралд УИХ-ын гишүүн Н.Ганибал тэргүүтэй албаныхан, төслийн төлөөлөгчид оролцож байна.

Тодруулахад, Оюутолгой уурхайд ашиглах усны нөөцийн хайгуулыг 2003-2007 онд хийжээ. Уг судалгааны үр дүнд уурхайгаас 40-70 км зайд байрлах Гүний хоолойн усны нөөцийг илрүүлсэн байна. Газрын гадаргаас 150-400 метрийн гүнд байрлах энэхүү дарагдмал ус чанарын хувьд ихээхэн эрдэсжилттэй, хайрга, элс, хөрзөн чулуулгын завсарт байрладаг онцлогтой.

Хүмүүс үүнийг булгийн цэвэр ус мэтээр эндүүрдэг. Бас ундны усны шаардлага хангахгүй, ахуйн хэрэглээнд тохиромжгүйг тогтоожээ. Энэ усыг цэвэршүүлэхгүйгээр зөвхөн үйлдвэрт ашиглах боломжтой.

Монгол Улсын Засгийн Газрын хэрэгжүүлэгч агентлаг Усны газрын дэргэдэх Шинжлэх ухаан, технологийн зөвлөлийн 2008 оны 11 дүгээр сарын 11-ний өдрийн хуралдаанаар Гүний хоолойн газрын доорхи усны ордыг гидродинамикийн болон балансын аргаар үйлдвэрлэлийн зэрэглэлээр үнэлсэн нөөцийг хүлээж авах тухай дүгнэлт гаргажээ.

Гүний хоолойг 6 тэрбум найман зуун сая шоо метр (6,800,000,000) усны нөөцтэй хэмээн тогтоосон байдаг. Оюу Толгой уурхай ажиллах хугацаандаа энэ нөөцийн ердөө 20 хувийг л ашиглах юм.

Монгол Улсын Усны тухай хуулийн холбогдох заалтыг үндэслэн 16.1.8, 23, 27 дугаар зүйл, Усны Газрын 2012 оны 4 дүгээр сарын 18-ны 4/431 тоот Оюутолгой компани жил бүр ус ашиглах гэрээг орон нутгийн холбогдох байгууллагатай байгуулан ажиллаж иржээ. Түүнчлэн энэхүү гэрээг үндэслэн ус ашигласны төлбөрөө төлдөг байна.

Оюутолгой төслийн гүний ус ашиглалтад хяналт тавих ажлын хэсгийн хурал эхэллээ