Монгол улсын төсвийн орлогын гол эх үүсвэрийг нүүрсний экспортоос бүрдүүлдэг. Харамсалтай нь цар тахлын улмаас нүүрсний экспорт гацаанд орж эдийн засагт хүндрэл үүсэхээр нөхцөл бий болсон. Нүүрсний гол худалдан авагч БНХАУ нүүрс нэвтрүүлэхийг хориглосон шийдвэр гарч, экспорт тэг зогсоод буй.

УИХ-ын гишүүн Н.Наранбаатар нүүрсний экспортыг нэмэгдүүлэх талаар өөрийн байр сууриа цахим хуудастаа бичжээ.

Нүүрсний экспортыг нэмэгдүүлэхийн тулд:

- Боомт дээрх төрийн байгууллагуудын удирдлага зохион байгуулалтыг сайжруулах, нэгдсэн удирдлагад оруулах, хүнд суртал шат дамжлагыг багасгах, ойлгомжгүй байдлыг алга болгох, ил тод нээлттэй шийдвэрээ гаргаж мэдээлдэг байх

- Боомтууд дээрх хорио цээрийн дэглэмээ чангатгах, халдваргүй бүс болгох. Аймаг, сумын онцгой комисс бүх хүчээ дайчлан ажиллах, жолооч нарын тусгаарлалт, ковидын шинжилгээг оновчтой, хяналттай, үнэн бодит болгох. Хятад талд ашигладаг тоног төхөөрөмж, оношлууртай адилхан болгох

- Жолооч нарын хэт их бөөгнөрлийг багасгах, сахилга дэг журмаа чангатгах. Энэ нь ковидын том эрсдэл болж байна. Өдрийн таталтын хэмжээндээ тааруулж ачилтаа хийх. Өнөөдрийн байдлаар өдөрт 200 машин гарч байхад Цагаан хадны бүсэд 4000-5000 жолооч аваачсан байна. Үүнийг цөөлж 1000 орчимд барих

- Чингэлэгт тээврийн терминалаа яаралтай ажиллуулах. Энэ нь хүн хоорондын контактыг бууруулах зорилготой. Гаалийн бүрдүүлэлт цаасаар биш ухаалаг гарцаар автоматаар хийгдсэнээр цар тахлын халдвар тархах эрсдэл буурна

- Ганц мод боомтын удирдлагуудтай уялдаатай ажиллах, нэвтрүүлэх тоо хэмжээг нэмэгдүүлэх арга, техникээ 2 талаасаа ярьж тохироод түүнийгээ яс мөрдөх

- Уурхайнууд өөрсдөө тээвэрлэлтээ хариуцах, борлуулалтаа боомт нөхцлөөр хийх, С зөвшөөрлийг АТҮТ биш уурхайнууд хүчин чадалдаа тохируулж гэрээт тээврийн компаниуддаа олгох

- Манайх 36.7 сая тонныг экспортлох, боомтын нэвтрэх хүчин чадал бий. Гол нь сүүлийн 10 гаруй жил яригдсан нүүрсний дэд бүтэц, тээвэр ложистикийн асуудлыг шийдвэрлэх шаардлагатай. Боомт болон төмөр замын холболтын асуудлыг яаралтай шийдчихвэл нүүрсний салбар тогтворжиж, улс орны эдийн засагт хувь нэмрээ оруулаад явах бүрэн боломжтой хэмээн Н.Наранбаатар гишүүн бичжээ.

Н.Наранбаатар: Сүүлийн 10 гаруй жил яригдсан нүүрсний дэд бүтэц, тээвэр ложистикийн асуудлыг шийдвэрлэх шаардлагатай