Монгол Япон хоёр орны аялал жуулчлалын салбарын шинэ шатанд гарах гарц, шийдлийн талаар санал солилцов
2022.07.27

Монгол Япон хоёр орны аялал жуулчлалын салбарын шинэ шатанд гарах гарц, шийдлийн талаар санал солилцов

БОАЖЯ-ны сайд Б.Бат-Эрдэнэ өнгөрсөн 5-р сард Япон Улсад албан айлчлал хийх үеэрээ 117 жилийн түүхтэй “Ниппон Трэйвэл” ХХК-ийн удирдлагуудтай уулзалт хийж, хоёр орны аялал жуулчлалын салбарт шинэ гарц, бүтээгдэхүүн үйлчилгээг бий болгох, Япон жуулчдад зориулсан аялал жуулчлалын төвлөрсөн шинэ маршрут, стандарт гаргах зэрэг асуудлаар санал солилцон хамтран ажиллахаар болсон.

Энэхүү уулзалтын үр дүнд тус компанийн бие төлөөлөл Монгол Улсад айлчилж байна. “Ниппон Трэйвэл” ХХК-ийн Конобү Абэ тэргүүтэй төлөөлөгчдийг БОАЖЯ-ны сайд Б.Бат-Эрдэнэ хүлээн авч уулзлаа. 

Талууд аялал жуулчлалын салбарын өнөө болон хэтийн төлөв байдлын талаар ярилцаж, цаашид Ковид цар тахалтай нийцэж тус салбарыг хөгжүүлэх шинэ бүтээгдэхүүн үйлчилгээг бий болгон хөгжүүлэх, тэр дундаа эрүүл мэндийн аялал жуулчлалыг Монгол Улсад хөгжүүлэх нөөц боломж, Япон Улсын жуулчдад Монгол орчныг сурталчлах, агаарын тээврийн нислэгийн давтамжийг нэмэгдүүлэн жуулчдын урсгалыг өнөөгийн төвшнөөс ахиулах, аялал жуулчлалын салбарт хоёр орны хамтын ажиллагааг шинэ шатанд гарах гарц, шийдлийн талаар санал солилцов.

Ковид цар тахлаас өмнө буюу 2019 онд Япон Улсаас 24 мянга орчим жуулчин манай улсад ирж байсан тоон мэдээлэл бий.
Цаашид агаарын тээврийн урсгалыг нэмэгдүүлэх, аялал жуулчлалын шинэ бүтээгдэхүүн үйлчилгээ, өөрөөр хэлбэл Япон жуулчдад зориулсан аяллын стандарт, жишгийг бий болгох нь жуулчдыг татах томоохон шийдэл болно гэдгийг “Ниппон Трэйвэл” ХХК-ийн төлөөлөл уулзалтын үеэр онцолж байв. 

Тус компанийн хувьд өнгөрсөн хоёр жил гаруй хугацаанд аялал жуулчлалын бүтээгдэхүүн үйлчилгээгээ түр зогсоогоод байсан бол одоо цар тахалтай нийцэж, аяллын шинэ бүтээгдэхүүн бий болгохоор анхаарал хандуулан ажиллаж байна гэсэн юм.

Түүнчлэн эдийн засгийг сэргээхэд аялал жуулчлалын салбар бодит хөшүүрэг болох боломжтой. Тиймээс энэ чиглэлийн шинэ бүтээгдэхүүн үйлчилгээг аялагчдад санал болгох бодит шаардлагатай тулгарч байна гэсэн юм. 

Уулзалтын үр дүнд: 

  • Аялал жуулчлалын салбарт хамтран ажиллах нөөц бололцоог нэмэгдүүлэх,
  • Аяллын бүтээгдэхүүн, үйлчилгээний талаар судалгаа хийх, 
  • Япон жуулчдад зориулсан стандартыг бий болгох, 
  • Япон жуулчдад зориулсан аялал жуулчлалын тусгайлсан маршрут төлөвлөх, 
  • Япон жуулчдад зориулсан аялал жуулчлалын кемп байгуулах, 
  • Япон жуулчдад зориулсан байгалийн аялал жуулчлалыг хөгжүүлэх талаар хамтарч ажиллах төлөвлөлтийг хэлэлцлээ.