Энэ талаар УИХ-ын гишүүн Ц.Даваасүрэн өөрийн цахим хуудаснаа дараах мэдээллийг оруулжээ.

Нэг: Орой бүр Оросоос цахилгаан эрчим хүч импортолж авах шаардлагагүй хараат бус Эрчим хүчний системтэй болно. Орой 6-9 цагийн хооронд айл өрхүүд плитка залгаж хоол хийх үед өдөр бүр 100-300 МВт эрчим хүч Оросоос импортолж авдаг. Манай нүүрсний станцууд огцом шууд 100 МВт цахилгаан үйлдвэрлэж гаргаж чаддаггүй. Ийм чадлын турбингенератор ажиллуулж эхлэхийн тулд 3,4 цаг галладаг. Тиймээс оройн цагаар огцом 100-300 МВт хэрэглээ үүсэхээр Оросоос цахилгаан импортолдог нь ийм учиртай болно. Харин Усан цахилгаан станц, хийн станцууд шууд кноп дараад л турбин эргэж цахилгаан үйлдвэрлэж эхэлдэг.Нэгэн түүхийг сөхье. 90 оны эхэн үед Оросын цэргийг Монголоос гаргасны дараа манай руу цахилгаан нийлүүлдэг шугмын тулгуур унасан гээд эрчим хүч нийлүүлэхээ зогсоочихсон. Тэр үед оройн цагаар хотын аль нэг хороолол, хэдэн аймгийн тогыг тасалж байж бусад хороолол, аймгийн иргэдийн хоолыг хийлгэдэг байлаа. Ахмадууд бол санаж байгаа байх. Одоо ч энэ нөхцөл хэвээрээ. Энэ байдлаас гарах гарц нь Усан цахилгаан станц юм. Мөн газ буюу хийн станц, батарей хуримтлуурын станцууд байж болно. Тийм учраас УБ-д 200 МВт цагийн батарей хуримтлуурын станц бариулахаар 2019 онд ажлыг нь эхлүүлж байлаа.

Хоёр: Аваарын үед системийг хурдан сэргээх боломжтой. Кноп дараад л Усан станц эрчим хүч нийлүүлж эхэлнэ. Нүүрсний станц ийм боломжгүй, 4 цаг болж байж цахилгаан үйлдвэрлэж эхэлнэ. Та бүхэн санаж байгаа бол аваар гарч улс даяараа харанхуйлахад 4 цаг болж байж эхнээсээ сэргэсэн. Өвлийн цагт бол хотын дулааны шугмууд хөлдчихнө.

Гурав: Сэргээгдэх эрчим хүчийг хослуулан хөгжүүлэх боломжыг олгодог. Нар жаргахаар нарны станц зогсож системд дутагдал үүснэ. Усан станц Үүнийг шууд нөхөөд л явчихна. Нүүрсний станц боломжгүй, тиймээс манайд нарны станц ашиглах боломж хязгаарлагдмал байдаг.

Сэтгүүлч

Сэтгүүлч Ц.Соёлмаа soyolmaa@vip76.mn