Өрхийн эрүүл мэндийн төвийн удирдах ажилтны ээлжит зөвлөгөөнд оролцлоо. Монголын өрхийн анагаах ухааны мэргэжилтнүүдийн холбооноос зохион байгуулдаг энэхүү зөвлөгөөнд хот, хөдөөгийн өрхийн эрүүл мэндийн 203 төвийн удирдлагууд оролцож ажлын үр дүнг хэлэлцэн, алдаа оноогоо ярилцаж, энэ онд төр, засгаас болон ЭМЯ-наас хэрэгжүүлэх бодлого шийдвэртэй танилцахаас гадна өрхийн эрүүл мэндийн төвүүдээс иргэдэд үзүүлэх тусламж, үйлчилгээний ямар үр дүн хүлээж байгаа талаар хэлэлцэн тодорхой шийдвэр гаргадаг юм байна.

Энэ удаагийн зөвлөгөөнд ЭМЯ, харьяа газрынхан, олон улсын байгууллагын төлөөллөөс гадна УИХ-ын дэд дарга С.Одонтуяа, УИХ дахь эмч гишүүдийн нэг Б.Бейсен нарыг урьсан байлаа. Зөвлөгөөнд оролцогчдод Эрүүл мэндийн сайдын албыг авснаас хойшхи гурван сар хүрэхгүйн хугацаанд хийсэн ажлаас өрхийн эрүүл мэндийн байгууллагатай холбоотой авсан арга хэмжээ, бодлого шийдвэрийг голлон танилцуулж цаашид анхаарч ажиллах шаардлагатай байгаа асуудлуудын талаар ярилцсан.

Гүйцэтгэлийн санхүүжилттэй холбоотой хийсэн өөрчлөлтүүдийн талаар тухайлбал, эмнэлэгт хэвтэн эмчлүүлэх тусламж, үйлчилгээг бус амбулаторийн тусламж үйлчилгээ, өдрийн эмчилгээг өргөжүүлэхэд өөрчлөлт тохируулгыг чиглүүлж байгаа, өрхийн эрүүл мэндийн төв нь орон нутгийн төр захиргааны байгууллагатай гүйцэтгэлийн гэрээ, харин даатгалын байгууллагатай даатгалын гэрээ байгуулж, өөр өөр шалгуураар ажлаа дүгнүүлж, давхардал, зөрчил үүсээд байгааг хууль тогтоомж, стандартад өөрчлөлт оруулж, залруулахаар ажиллаж байгаагаа хэлсэн.

Мөн эрүүл мэндийн салбарын цахим шилжилт зохицуулалт муу байснаас өнөөдөр эмч нар нэг мэдээллийг давтан олон системд шивэх, үүний улмаас алдаа гарч, алдаатай нэхэмжлэл буцаагдах зэргээр ажлын ачаалал нэмэгдэж, ажил үнэгүйдэх явдал гарч байгааг шийдэх үүднээс буруу шивсэн бол алдааг 48 цагийн дотор залруулах боломжтой болгосон. Алслагдсан орон нутагт оршин суугаа 60-аас дээш насны, хөгжлийн бэрхшээлтэй зэрэг тусгай хэрэгцээтэй иргэдийн хөнгөлөлттэй эмийн жороор харгалзан дэмжигч нар нь эм худалдан авах боломжийг бүрдүүлсэн нь өрхийн эмч нарын ажилд тодорхой дэмжлэг болж буй юм.

Түүнээс гадна өрхийн эмнэлгийнхэнд анхан шатны тусламж, үйлчилгээний чанар, хүртээмжид онцгой анхаарч, өөрсдийн үзүүлж чадах тусламж үйлчилгээг шат шатандаа цаг тухайд нь хүргэдэг байхаас гадна иргэдтэйгээ эргэх холбоо тогтоож тэднийг аливаа өвчнөөс урьдчилан сэргийлэх мэдээллээр хангах нь чухал байгааг хэлсэн. Өрхийн эмнэлгийнхэн 20 гаруй жилийн түүхтэй өрхийн эрүүл мэндийн тогтолцоог хэвээр хадгалах, ажиллах нөхцөл, байр савны хүрэлцээг сайжруулах, гүйцэтгэлийн санхүүжилтээр олгож байгаа тусламж үйлчилгээний өртгийг нэмэгдүүлэх, санхүүжилтээ бүрэн авахад ямар нэг хүндрэл учирдаггүй болгохтой холбоотой саналуудыг хэлж байлаа.

Сэтгүүлч

Сэтгүүлч Ц.Соёлмаа soyolmaa@vip76.mn