Отрын бүс нутагт өнжсөн, цаг хугацаандаа гараагүй малчдыг албадан гаргана
Аймаг дундын отрын бүс нутгийн нөхцөл байдлыг судалж, байнгын хорооны шийдвэрийн төсөл боловсруулах үүрэг бүхий ажлын хэсэг Дэлгэрхаан сумын Баянхаан, Долоод, Хэрлэн тооно багийн малчид, иргэдийн төлөөлөл 80 гаруй хүнтэй уулзаж, тэдэнд тулгамдаж буй асуудлын талаар сонслоо.
УИХ-ын гишүүн Ц.Идэрбатын "Эргэх холбоо-Иргэдээ сонсох" уулзалтаар отрын бүс нутагт газар нутаг нь харьяалагдах Цэнхэрмандал, Дэлгэрхаан, Жаргалтхаан сум, Хэрлэнбаян-Улаан тосгоны иргэдээс дэвшүүлсэн саналыг УИХ-ын БОХХАА-н байнгын хороонд уламжилж, асуудлыг хэлэлцүүлсэний дүнд байнгын хорооны дэргэд УИХ-ын 7 гишүүний бүрэлдэхүүнтэй ажлын хэсэг байгуулж, ийнхүү нөхцөл байдлыг судалж байна.
Дэлгэрхаан сумын иргэдээс отрын бүс нутгийг эзэлж суусан гадны малчид цөөнгүй бий. Отор нүүдэл дагасан малын өвчлөл, сэг зэмээ асга хад, жалганд ил задгай орхигдуулдаг, хариуцлагагүй, хээл хахууль, авилга өгч өнжиж, урт хугацаанд сууж байгаа жишиг бий гэж шүүмжлэлтэй хандаж, отрын бүс нутгийг татан буулгаж, газар нутгаа чөлөөлүүлэх саналтай байгаагаа хэллээ.
Мөн Хэрлэнбаян-Улааны ховор ан амьтан цөөрч, бэлчээр илт доройтсон, Дэлгэрхаан сум Аураг ордод Монголын Эзэнт гүрний 4 их хаан "хаан ширээ"-нд суусан, түүхийн чухал ач холбогдолтой, дурсгалууд олон бий. Зуун булаг, мянган өвөлжөөтэй хэмээн нэрийдсэн энэ өгөөмөр нутаг унаган төрхөө алдаж, бэлчээрийн доройтолд орж буйг анхаарч цаашид бодлогоор хамгаалах, иргэдийн олон жилийн хүсэлтийг хүлээн авч тодорхой шийдвэр гаргахыг хүссэн юм.
Түүнчлэн Жаргалтхаан сумын Засаг дарга Л.Цэнгэл сумын иргэд отрын бүсээс сумын газар нутгаа чөлөөлүүлэх хүсэлтэй байгааг уламжлав.
Ажлын хэсгийн бүрэлдэхүүн иргэдийн саналыг хүлээн авснаас гадна аймгийн Засаг дарга Ц.Чогсомжав, Аймаг дундын отрын бэлчээр ашиглалтын захиргаатай хамтран отрын бүс нутагт мөрдөх дүрэм журмыг сахиулахад анхаарах, отрын бүсээс цаг хугацаандаа гараагүй, өнжсөн малчдыг албадан гаргах, сахилга хариуцлага тооцон ажиллахаар боллоо.
