УИХ-ын гишүүн, Хөдөлмөр, нийгмийн хамгааллын сайд С.Чинзориг Олон улсын шилжилт хөдөлгөөний байгууллагын Хятад-Монголыг хариуцсан товчооны захирал Жюзеппэ Крочетийг Төрийн ордонд хүлээж авч уулзлаа.

Уулзалтаар манай улсад хэрэгжүүлж эхлэх гэж буй "Монгол Улс дахь дотоодын шилжилт хөдөлгөөнийг ойлгож удирдах нь" төслийн талаар санал солилцож, хамтран ажиллахаар болсон бөгөөд сүүлийн 20 гаруй жилд хөдөө орон нутгаас нийслэл рүү эрчимтэй чиглэсэн шилжилт хөдөлгөөнийг бууруулах нь бидний хувьд тулгамдсан асуудлын нэг болоод байгаа тухай ярилцсан байна. 

Хөдөөнөөс хот руу чиглэсэн их нүүдлийн шалтгаан орон нутагт боловсрол, эрүүл мэнд зэрэг төрийн үйлчилгээний чанар хүртээмж хангалттай биш, хөдөлмөр эрхлэх боломж бага, ажлын байр хомс, дэд бүтцийн хүртээмж муу зэргээс үүддэг бөгөөд иргэд амьдралын чанараа сайжруулах гэж төв газар бараадаж байгаа. Гэвч ирсэн хойноо шилжилт хөдөлгөөний бүртгэл хийлгээгүйн улмаас нийгмийн үйлчилгээг авч чадахгүй байх улмаар амьжиргаа нь дордож нийгмийн эмзэг хэсэг рүү шилжих эрсдэл хамгийн их гардаг.

Манай улсын хувьд өргөн уудам газар нутагт 3,2 сая хүн ам амьдарч буй тул хүн амын нягтаршил бага, тархуу хэрнээ нийслэл Улаанбаатарт нийт хүн амын бараг 50 хувь нь амьдарч байна. Энэ нөхцөлд төрийн үйлчилгээ үзүүлдэг байгууллагуудын ачаалал нэмэгдэж иргэдэд түргэн шуурхай, чанартай үйлчлэх боломж хомсдож байна. Мөн ЕБС-иудын ачаалал нэмэгдсэнээс гурван ээлжээр хичээллэдэг сургуулийн тоо буурахгүй байна. 

Төр засгаас төвлөрлийг сааруулах, шилжилт хөдөлгөөний эрчмийг бууруулахын тулд орон нутагт төрийн үйлчилгээний чанарыг сайжруулах, ЕБС-ийн хүртээмжийг нэмэгдүүлэх, бүх аймгийг засмал замаар холбох, харилцаа холбооны хүрээг тэлэх зэрэг ажлуудыг хийж байгаа. Мөн УИХ-аас баталсан Татварын хуулийн шинэчлэлээр ирэх оноос орон нутагт аж ахуй эрхэлж, бизнес хийж байгаа бол татварын хөнгөлөлт үзүүлэх боломжийг бүрдүүлж байгаа нь шилжилт хөдөлгөөний хурд саарахад сайнаар нөлөөлнө гэж харж байгаа. 

Чухам яг ийм цаг үед Олон улсын шилжилт хөдөлгөөний байгууллагаас Монголд хэрэгжүүлэх гэж буй энэ төсөл өндөр ач холбогдолтой юм. 

ОУШХБ нь дэлхийн 170 гаруй орны гишүүнчлэлтэй Засгийн газар хоорондын байгууллага бөгөөд аливаа улс орны хувьд шилжилт хөдөлгөөн гэдэг өөрсдийн шийдэх асуудал гэдгийг хүлээн зөвшөөрч, Засгийн газарт заах биш харин тулгамдсан асуудлаар судалгаа, дүн шинжилгээ хийж, мэдээллийн сан бий болгох замаар бодлогоо зөв оновчтой тодорхойлоход туслах үүрэгтэй гэдгийг Жюзеппэ Крочети хэлж байсан. 

Тэрбээр шилжилт хөдөлгөөний чиглэлээр дэлхийн улс орнуудад олон жил ажилласан туршлагатай нэгэн юм байна.