УИХ-ын чуулганы өнөөдрийн \2020.01.31\ нэгдсэн хуралдаанаар БНХАУ-д дэгдсэн шинэ төрлийн коронавирусийн эрсдэлээс урьдчилан сэргийлэх чиглэлээр хэрэгжүүлж буй ажлуудын талаарх Засгийн газрын мэдээллийг сонсов.

Мэдээллийг Батлан хамгаалахын сайд, Улсын онцгой комиссын дэд дарга Н.Энхболд танилцуулсан юм.

Вирусээс хамгаалах асуудлаар Засгийн газар хоёр, Улсын онцгой комисс хоёр, Үндэсний аюулгүй байдлын зөвлөл нэг удаа хуралдсан байна. Одоогоор Монгол Улсад тус вирусээр хадварласан тохиолдол гараагүй ч урьдчилан сэргийлэх талаар бүхий л боломжит ажлыг өрнүүлж буй юм. Тухайлбал, Улсын онцгой комиссын хуралдаанаар БНХАУ-ын Ухань хот дахь монгол оюутнуудыг тээвэрлэж ирэхэд шаардагдах 53.000 ам.долларын зардлыг Засгийн газрын тусгай сангаас гаргах, онцгой байдал, хил хамгаалах, мэргэжлийн хяналтын мэргэжилтнүүдийн эрүүл мэндийг хамгаалахад шаардлагатай хөрөнгийн эх үүсвэрийг мөн шийдвэрлсэн байна.

Мөн БНХАУ болон шинэ коронавирусний халдварын голомт газраас ирсэн, сэжигтэй иргэдийг өвчний нууц үеийг дуустал тусгаарлах байр бэлджээ. Түүнчлэн төрийн золголт, нутгийн зөвлөл, албан байгууллагууд, хамт олны золголт хийхгүй байх, Сар шинийн баярын Үндэсний бөхийн барилдаан зэрэг нийтийг хамарсан спорт, урлаг, сургалтын арга хэмжээг явуулахгүй байхаар шийдвэрлэсэн юм.

Үндэсний аюулгүй байдлын зөвлөлийн зөвлөмжийн дагуу Засгийн газрын өнөөдрийн хуралдаанаар зарим хилийн боомтыг хаах шийдвэр гаргажээ. Агаарын зам, төмөр зам, авто замын бүх боомтоор БНХАУ-ын иргэд, тус улсаар дамжин Монгол Улсыг зорьж байгаа гуравдагч орны иргэнийг ирэх сарын 1-нээс гуравдугаар сарын 2-ныг дуустал Монгол Улс руу нэвтрүүлэхгүй байхаар шийдвэрлэжээ. Харин тус улсад амьдарч байгаа эх орондоо ирж буй Монгол иргэнийг Буянт-Ухаа нисэх буудал, Замын-Үүдийн галт тэрэгний буудлаар авч байхаар шийдвэрлэсэн байна. Гэхдээ худалдаа арилжаа, Монгол Улсаас гадагшаа гаргаж байгаа нүүрс, газрын тосыг хэвийн үргэлжилнэ гэдгийг Батлан хамгаалахын сайд Н.Энхболд хэллээ.

Мөн БНХАУ-д буцалтгүй тусламж олгох шийдвэр гаргасан гэдгийг онцлон тэмдэглэв. БНХАУ-ын Ухань хотод Монголын 33 иргэн байгаагаас 2 нь тэндээ үлдэх, 31 нь эх орондоо ирэх хүсэлт гаргасан байна. Энэ дагуу БНХАУ-д ноот бичиг хүргүүлж, онгоц нисгэж иргэдээ татаж авах зөвшөөрлөө авчээ. Одоогоор онгоцоо хэзээ нисгэх, хэрхэн иргэдээ авах талаар нарийвчлан тохирох ажил үргэлжилж байгааг хэллээ.

Батлан хамгаалахын сайдын мэдээллийн дараа УИХ-ын гишүүн Б.Бат-Эрдэнэ, О.Баасанхүү, М.Билэгт, Д,Оюунхорол, Ц.Гарамжав, Ж.Энхбаяр, С.Бямбацогт, Л.Оюун-Эрдэнэ, Д.Эрдэнэбат, Л.Болд, С.Жавхлан нар асуулт асууж хариулт авлаа. 

Ингээд мэдээлэл авч дууссаны дараа Улсын Их Хурлын намрын чуулган өндөрлөж Их Хурлын Дарга Г.Занданшатар үг хэлэв. 

Энэ хугацаанд УИХ-ын нэгдсэн чуулган 32, Байнгын болон Дэд, Түр хороод 119 удаа хуралдаж, 154 хууль, 51 тогтоол баталсан байна. Улмаар 19 хэлэлцүүлэг, гурван гурван нээлттэй сонсгол зохион байгуулжээ.

Энэ талаар УИХ-ын дарга Г.Занданшатар,

“Монгол Улсын Үндсэн хуульд оруулах нэмэлт, өөрчлөлтийг баталсан нь парламентын түүхэнд тэмдэглэн үлдэх болно. Түүнчлэн Монгол Улсын 2020оны Төсвийн тухай, Нийгмийн даатгалын сангийн 2020 оны төсвийн тухай, Эрүүл мэндийн даатгалын сангийн 2020 оны төсвийн тухай зэрэг хуулийн хугацаатай, улс орны эдийн засаг, нийгмийн хөгжилд чухал ач холбогдол бүхий асуудлаа шийдэж чадсан. Үүнээс гадна ахмадуудын тэтгэврийн зээлийг нэг удаа төрөөс төлөх тухай хуулийг баталсан нь баялгийн өгөөжийг ахмадууддаа хүртээх боломжийг бүрдүүлсэн алхам боллоо. Оюутолгойн ордын ашиглалтад Монгол Улсын эрх ашгийг хангуулах тухай тогтоолыг баталсан. Төсвийн тухай хуулийн дагуу 2020 он ирэх он их бүтээн байгуулалтын жил байх болно. Монгол Улс ФАТФ-ын “саарал жагсаалт”-аас нэн даруй гарах ёстой. Тиймээс ч УИХ-аас холбогдох бусад хуульд нэмэлт, өөрчлөлт оруулж, олон улсын гэрээгээр хүлээсэн үүргээ биелшүүлэх, ФАТФ-ын зөвлөмжийг хэрэгжүүлэх гол нөхцлийг бүрдүүллээ. Энэ оны дөрөвдүгээр сард энэ удаагийн парламентын бүрэн эрхийн хугацааны отгон чуулган эхэлнэ. Энэ үеэр Монгол Улсын Үндсэн хуульд оруулсан нэмэлт, өөрчлөлтийг хэрэгжүүлэх эрх зүйн өөрчлөлт хийнэ. УИХ-ын тухай, Засгийн газрын тухай, Хот тосгоны эрх зүйн байдлын тухай, Нийслэлийн эрх зүйн байдлын тухай зэрэг хуулийг батлах зайлшгүй шаардлага үүсч байна. Эдгээр хуулийг хэлэлцэн батлах бэлтгэл ажлыг хангахыг Засгийн газар, УИХ-ын Тамгын газарт үүрэг болгож байна” хэмээв.