Засгийн газрын өнөөдрийн хуралдаанаар, шинэ коронавируст халдвараас урьдчилсан сэргийлэх зорилгоор төрийн болон нутгийн захиргааны байгууллага, хуулийн этгээдийг маргаашнаас гамшгаас хамгаалах өндөржүүлсэн бэлэн байдлын зэрэгт шилжүүлэх тухай тогтоол гаргасан хэмээн Шадар сайд Ө.Энхтүвшин мэдээлэв.

Ерөнхийлөгчийн өнөөдрийн 10 тоот зарлигтай холбогдуулан Засгийн газраас дээрх тогтоолыг гаргасан бөгөөд цагаан сарыг нийтээр тэмдэглэхгүй байх нь зүйтэй гэсэн заалтыг тусгасан гэдгийг Шадар сайд Ө.Энхтүвшин мэдээллийнхээ эхэнд онцлов. Тэрбээр, “Шинэ коронавируст халдварын оргил үе цагаан сарын орчим таарч болзошгүй гэж дэлхийн эрдэмтэд тандаж байна. Нөгөөтэйгүүр, БНХАУ-ын ӨМӨЗО-ы Баяннуурын Халиут хот буюу Монгол Улсын хилээс 120 км-ийн цаана шинэ коронавирусний халдварын тохиолдол бүртгэгдсэн. Мөн Шинжааны Бархөл хотод буюу хилээс 19 км-ийн цаана халдварын тохиолдол шинээр бүртгэгдсэнийг зарлаж байна” хэмээв.

Нөхцөл байдалтай холбогдуулан гуравдугаар сарын 2-ныг хүртэл тогтоосон сургууль, цэцэрлэгийн сургалт зэрэг хорио цээрийн дэглэмийг цаашид сунгаж болзошгүй гэдгийг тэмдэглэлээ. Нийтээр тэмдэглэх баярын тухай хуулийн дагуу сар шинийн баярын өдрүүдэд нийтээр амрах зохицуулалттай. Тиймээс сар шинийн баярын үеэр нийтээр амраахгүй байх эсэх асуудлыг хуралдааны үеэр хөндөж ярилцаагүй гэдгийг Шадар сайд мэдээллийнхээ үеэр дурдлаа. Гэхдээ цаашид нөхцөл байдлыг ажиглаж энэ талаар дахин хэлэлцэж шийдвэр гаргахыг үгүйсгэхгүй хэмээн тодотгов. Төрийн болон төрийн захиргааны байгууллагын ажилчдыг хэсэгчилсэн байдлаар гамшгаас хамгаалах тусгай горимд шилжүүлснээр, цагаан сарын баярын үеэр шаардлагатай үед төрийн байгууллагын албан хаагчид ажиллах нөхцөл бүрджээ.

ГАМШГИЙН ТУХАЙ ХУУЛЬ:

8.3.Өндөржүүлсэн бэлэн байдлын үед дараахь арга хэмжээг авч хэрэгжүүлнэ.
8.3.1.зарлан мэдээлэх дохиог хүн амд хүргэх, гамшгаас хамгаалах төлөвлөгөөнд тодотгол хийх;
8.3.2.засаг захиргаа, нутаг дэвсгэрийн нэгжийн удирдлага, штабын бүрэлдэхүүнийг гамшгийн үеийн үүрэгт ажилд нь оруулах;
8.3.3.удирдлагын байр, харилцаа холбоо, мэдээллийн хэрэгслийг байнгын бэлэн байдалд оруулах;
8.3.4.мэдээ, мэдээллийг дараалал харгалзахгүй хүлээн авах, дамжуулах, сэрэмжлүүлэх дохио мэдээллийг байгууллага, иргэдэд тогтмол хүргэх, тэдний сонор сэрэмжийг дээшлүүлэх;
8.3.5.хүн хүч, техник, материал хэрэгслийг дайчлан гаргах ажлыг зохион байгуулах, удирдлага, штаб, аврах анги, отряд, салбар, нэгж болон мэргэжлийн ангитай жигдрэлтийн сургууль, дадлага явуулах;
8.3.6.хорио цээрийн дэглэм тогтоох;
8.3.7.гамшгийн нөөцийг нэмэгдүүлэх,

Ө.Энхтүвшин: Гамшгаас хамгаалах өндөржүүлсэн бэлэн байдлын зэрэгт шилжүүллээ