Түр хорооны хуралдаан /КОВИД-19/-аар Коронавируст халдвар /Ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн 7 дугаар зүйлийн 7.1 дэх хэсэгт заасны дагуу Монгол Улсын Засгийн газраас 2021 онд авч хэрэгжүүлсэн арга хэмжээний талаарх мэдээлэл болон тус хуулийн 8 дугаар зүйлийн 8.1 дэх хэсэгт заасан Улсын Онцгой комиссоос авч хэрэгжүүлж буй арга хэмжээний талаарх мэдээлэл, Эрүүл мэндийн яамнаас авч хэрэгжүүлж буй арга хэмжээ, коронавируст халдвар /Ковид-19/-ын нөхцөл байдал, вакцинжуулалтын талаарх мэдээллийг танилцууллаа.

Энэ үеэр гишүүд асуулт асууж, байр сууриа илэрхийлсэн юм.

УИХ-ын гишүүн С.Чинзориг: Тогтоол батлагдаад удаагүй байгаа учраас биелэлт гэж нарийн хэрэгжсэн, хэлэх юм багатай, боловсруулж байгаа гээд байна. ЭМД-ийн санхүүжилтээс 2021 оны гүйцэтгэлээр эрүүл мэндийн байгууллагууд хэчнээн төгрөгийн дутуу санхүүжилттэй гарсан бэ? Тухайлбал, Өвөрхангай аймгийн БЭОТ намраас хойш 800 сая төгрөгийн дутуу санхүүжилттэй гэж ярьсан, яг үүгээрээ гарсан байна лээ. Үүнийгээ нэгдүгээр сард өгөх юмуу, үгүй юу?

Улсын хэмжээгээр даатгалын санхүүжилт хэчнээн байна вэ, үүнийг нь хэзээ барагдуулах юм бэ?

Хоёрдугаарт, өмнөх ЭМД-ийн тухай хуульд орсон өөрчлөлтөөр сонгон шалгаруулалтын журмыг шинэчлэх ёстой. Та нар яагаад энэ сонгон шалгаруулалтын журмаа шинэчлэхгүй, 2019 оноос хойш сонгон шалгаруулалт явуулаагүй юм байна гэж ойлгосон. Хуучин журамд чинь 2 жил тутамд сонгон шалгаруулалт явуулна гэсэн байна лээ.

Та нар хууль зөрчөөд сонгон шалгаруулалтын журмаа шинэчлэхгүй явж ирсэн байна, сонгон шалгаруулалтаа ч явуулаагүй байна. үүнээс чинь үүдээд бүх эрүүл мэндийн байгууллага шаардлага хангадаг ч бай, үгүй  ч бай ЭМД-ын сангаас санхүүжилт авч, санхүүжилт чинь хүрэхгүй байгаа юм бишүү гэж хардаж байна.

Гуравдугаарт, цаашдаа бид сонгон шалгаруулалт явуулах ёстой юмуу, үгүй юу? ЭМ-ийн сайдын тушаалаар бид магадлан итгэмжлэл өгчихдөг. Түүний дараагаар ЭМДЕГ магадлан авсан байгууллагуудын дунд сонгон шалгаруулалт явуулна гээд сонгон шалгаруулалтаа явуулалгүй 2 жил болоод түүнээс нь болж 13 мянган хүн амтай өрхийн эмнэлэг санхүүжилтээ авч чадахгүй хагас жил болж байна шүү дээ.

Чуулган дээр ч хэлсэн. Бид чинь онцгой нөхцөлд ажиллаж байгаа юм байгаа биз дээ. Ковид-19-ийн хуулиа сунгаад, бүх санхүүжилтээ эрүүл мэндийн яаманд өгөөд байдаг ч өөрсдөө хуулиа биелүүлэхгүй, хүнд сурталтай удаан ажиллаж иргэд, эрүүл мэндийн байгууллагыг хохироогоод байна шүү дээ.

Эмнэлэгүүдэд магадлан итгэмжлэл олгоход эмнэлгүүд нь ч хугацаа хоцорч өгдөг, танайх магадлан итгэмжлэлийнхээ хурлыг хожуу хийж хугацаа нь дууссанаас хойш 2 сарын дараа магадланг нь сунгадаг. Сунгах сунгахдаа хугацаа нь дууссан өдрөөс тушаал гаргачихаар 2 -3 сарын хугацаанд эмнэлгүүд нь магадлангүйгээр санхүүжилт авч чадахгүй өөрсдөө зохиомлоор эрүүл мэндийнхээ байгууллагуудыг боомилоод байх юм.

Үүнийгээ боль, та нарт хариуцлагагүй зүйл их байна. Хархорин ганцхан өрхийн эмнэлэгтэй С.Энхболд сайдаа. 13-14 мянган хүн амтай. Эмнэлэг нь нэгдсэн эмнэлэг гэсэн статустай учраас өрхийн эмнэлгийн үйлчилгээ үзүүлж, багцийн санхүүжилт авч болдоггүй. Ганц өрхийн эмнэлгийнх нь хүчин чадал хүрдэггүй. Энэ зөрчлийг шийдэж болохгүй юу?

Түүний асуултад ЭМЯ-ны Бодлого, төлөвлөлтийн газрын дарга н.Буянтогтох хариулав.