Хууль зүй, дотоод хэргийн яам, Хууль зүйн үндэсний хүрээлэн хамтран "Бүх нийтийн эрх зүйн боловсролыг дээшлүүлэх үндэсний хөтөлбөрийн хэрэгжилт ба Дараагийн бодлогын чиглэл" сэдэвт хэлэлцүүлгийг өнөөдөр зохион байгууллаа.

Монгол Улсын Засгийн газраас 2018 онд батлан хэрэгжүүлж эхэлсэн "Бүх нийтийн эрх зүйн боловсролыг дээшлүүлэх үндэсний хөтөлбөр" нь иргэдийн эрх зүйн мэдлэгийг дээшлүүлэх, хууль тогтоомжийн талаарх мэдээлэл, эрх зүйн боловсролыг олон нийтэд хүртээмжтэй хүргэх, эрх зүйн боловсролын тогтолцоог боловсронгуй болгож, цаашлаад төрийн байгууллагуудын уялдаа холбоог сайжруулах, олон нийтийг соён гэгээрүүлэх үйл ажиллагаанд шинэлэг арга зүй нэвтрүүлсэн зэрэг олон эерэг өөрчлөлт, ахиц дэвшлийг бий болгож чадсан юм. 

Үүнтэй холбогдуулан, Хууль зүй, дотоод хэргийн яамны Төрийн нарийн бичгийн дарга Н.Мягмар дараах мэдээллийг өглөө.

Хууль зүй, дотоод хэргийн яамны Төрийн нарийн бичгийн дарга Н.Мягмар:

Урьдчилсан хөндлөнгийн байгууллагын гаргасан судалгаагаар энэ хөтөлбөр амжилттай хэрэгжсэн. Цаашид энэ хөтөлбөрөө үргэлжлүүлж хэрэгжүүлэх, мөн санхүүжилт, тогтолцооных нь хувьд эргэж харах, сайжруулах зүйлүүд байна гэдэг үндсэн дүгнэлт гарсан юм. Энэ дүгнэлт дээр үндэслэж, дараагийн бодлогын чиглэлээ тодорхойлж, үр дүнг нь хэлэлцэхээр өнөөдрийн хэлэлцүүлгийг зохион байгуулж байна.  Монгол Улсын Үндсэн хуулиар иргэний хүмүүнлэг ардчилсан нийгмийг зохицуулан, цогцлуулан хөгжүүлнэ гэсэн эрхэм зорилгыг тавьсан. Үүнийг  хэрэгжүүлэхэд иргэн бүр хүний эрхийн мэдрэмжтэй, эрх зүйн мэдлэгтэй, чадавхтай байж хүмүүнлэг иргэний ардчилсан нийгэм бий болно.

Тийм учраас төрийн анхны баримт бичиг болох бүх нийтийн эрх зүйн боловсролын үндэсний хөтөлбөрийг хэрэгжүүлэх хүрээнд Хууль зүйн туслалцааны төв манай улсын хэмжээнд 34 салбар байгуулагдсан. Энэ төвөөр 65 мянга гаруй иргэд, 5 жилийн хугацаанд үйлчилгээ авсан байна. Өөрөөр хэлэх юм бол "улсын өмгөөлөгч" гэж ярьдаг энэ тогтолцоог манай улс нэвтрүүлсэн. Энэ нь Азийн улс орнуудад тэргүүлэх сайн туршлагын нэг болдог. Мөн эрх зүйн сургагч багш, эрх зүйн хөтөч бэлтгэгдсэн юм. Нийт 800 гаруй сургагч багш, 2200 гаруй хөтөч нар бэлтгэгдсэн байна. Эрх зүйн боловсролыг дээшлүүлэх сургалт сурталчилгаанд нийтдээ цахимаар болон биечлэн зохион байгуулагдсан арга хэмжээнд 300 мянган иргэд оролцсон. Тийм учраас олсон амжилтаа үргэлжлүүлж, илүү сайн болгохын тулд дараагийн чиглэлээ тодорхойлохоор зорьж байна. Энэ зорилт Засгийн газрын үйл ажиллагааны 2024-2028 оны хөтөлбөрт тусгагдсан юм.

Өнөөдрийн энэхүү хэлэлцүүлгийн ач холбогдол нь зөвхөн дээрх үр дүнг хэлэлцэж, дүгнэх төдий бус, цаашид бүх нийтийн эрх зүйн боловсролыг дээшлүүлэх, илүү боловсронгуй болгох, тэр дундаа иргэн бүрд хууль дээдлэх зарчмыг төлөвшүүлэх, иргэдийн оролцоог нэмэгдүүлэхэд чиглэсэн эрх зүйн томоохон баримт бичгийн суурь чиглэлийг тодорхойлох хүрээнд болж буйгаараа онцлогтой.

Хууль зүйн үндэсний хүрээлэнгийн Эрдэмтэн, нарийн бичгийн дарга М.Түвшинжаргал:

Хүн бүр мэргэшсэн хуульч байх албагүй. Гэхдээ хүн бүрт зайлшгүй эрх зүйн боловсрол анхан шатын мэдлэг хэрэгтэй болсон ийм цаг үед бид амьдарч байна. Эрх зүйн боловсрол, хууль тогтоомжууд өдөр ирэх тусам шинэчлэгдэж, агуулга нь өөр болж байна. Үүнтэй уялдуулаад иргэдийнхээ   эрх зүйн боловсрол, мэдлэгийг хэрхэн дээшлүүлж, хүний эрхэд суурилсан мэдлэг мэдээллийг нийгэмд түгээх үндсэн зорилгын хүрээнд энэ хөтөлбөрийн хэлэлцүүлэг өрнөж байна. Өнгөрсөн 5 жилийн хугацаанд энэ хүрээнд 349 үндсэн ажлууд хийгдсэн. Манай хөтөлбөрийн нийт гишүүн 18 төрийн байгууллагууд, төрийн бус байгууллагууд оролцон 340 гаруй  ажил хийжээ. Мөн цахим платформ, дижитал технологи дээр тулгуурласан хууль зүйн анхан шатын олон мэдээллийг иргэдэд хүргэсэн. Хууль зүйн зөвлөгөө өгдөг шинэ дугаар нээсэн зэрэг олон ажил хийгдлээ.

Энэхүү хэлэлцүүлгээр "Хөтөлбөрийн хэрэгжилтийн үр дүн, хөндлөнгийн судалгааны санал зөвлөмж", "Үндэсний хөтөлбөр орон нутагт амжилттай хэрэгжсэн туршлага", "Эрх зүйн хөтөлбөрийн хэрэгжилт ба ололт сургамж", "Бүс нутгийн хэмжээнд хэрэгжүүлсэн эрх зүйн боловсролыг дээшлүүлэх хөтөлбөрүүдийн сайн туршлага", "Бодлогын чиглэлд анхаарах зарим асуудал" сэдвийн хүрээнд холбогдох албаны хүмүүс илтгэл танилцуулан мэдээлэл хүргэж, бүх нийтийн эрх зүйн боловсролыг дээшлүүлэх үндэсний хөтөлбөрийн хэрэгжилтийн үр дүн, цаашид үргэлжлүүлэх бодлогын чиглэлийг хэрхэн үр дүнтэй шийдвэрлэх, сайжруулах тал дээр үзэл бодлоо илэрхийлэн санал солилцсон юм.

Хэлэлцүүлэгт тус яамны Төрийн нарийн бичгийн дарга Н.Мягмар, Сургалт, сурталчилгаа, хөтөлбөрийн хэрэгжилтийн газрын дарга Г.Эрдэнэбулган, Хууль зүйн үндэсний хүрээлэнгийн Эрдэмтэн, нарийн бичгийн дарга М.Түвшинжаргал болон хөтөлбөрийг хэрэгжүүлэх Үндэсний зөвлөл буюу зарим төрийн захиргааны төв байгууллагын удирдлагууд болон олон улс, төрийн бус байгууллага, хууль зүйн салбарын эрдэмтэн, судлаачид, их дээд сургуулийн багш нар зэрэг нийт 50 гаруй байгууллагын төлөөллүүдээс гадна 21 аймгийн Засаг даргын Тамгын газрын холбогдох албаны хүмүүс цахимаар оролцлоо.

Сэтгүүлч

Сэтгүүлч Ц.Соёлмаа soyolmaa@vip76.mn