С.Чинзориг Ц.Мөнх-Оргил 2021.01.26 | Vip76.mn

Ц.Мөнх-Оргил: Цэцийн дүгнэлтийг хүлээж авбал хуульд ямар агуулгатай өөрчлөлт оруулах вэ?

УИХ-ын Хууль зүйн байнгын хороо хуралдаж байна. Хуралдаанаар Монгол Улсын Үндсэн хуулийн цэцийн 2021 оны 01 дүгээр дүгнэлтийг хэлэлцлээ. 

Цэцийн дүгнэлттэй холбоотойгоор байнгын хорооны гишүүд асуулт асуулаа. 

УИХ-ын гишүүн Ц.Мөнх-Оргил:

"Цэцийн хуралдаанд УИХ-ыг төлөөлөн оролцсон С.Чинзориг гишүүнээс асууя. Та хууль батлагчийн хувьд дээрх хуулийн заалтууд Үндсэн хууль зөрчөөгүй гэсэн тайлбар хийсэн гэж ойлголоо. Таны бодлоор энэ заалтууд үнэхээр зөрчөөд байгаа юм уу? эсвэл цэц хуулийн зорилго, заалтыг буруу ойлгож, буруу дүгнэлт гаргачихав уу? 

Энэ дүгнэлтийг хүлээн зөвшөөрөөд 7 сарын 1-ний дотор хуульд өөрчлөлт оруулах ёстой юм бол ямар агуулгатай өөрчлөлт оруулах ёстой вэ? Эхэд өгөхгүй гэвэл эх, эцэг 2-т өгөх юм уу эсвэл ерөөсөө огт өгөхгүй юм уу? 0-3 насны хүүхдээ асарч байгаа эх гэдэг дээр хүнийг хүйсээр ялгаварлан гадуурхсан байна гэсэн дүгнэлт гаргасан байна гэж цэц үзээд байгаа. Тэгэхээр эх, өрх толгойлсон эцэг гэж байх юм уу? Эсвэл эх, эцэг 2-т хоёуланд нь өгөх юм уу?

Хүүхдээ асарч байгаа гэдэг тодорхойлолтыг Хөдөлмөрийн хуулийн 106.1-ээр эшлэл татсаныг буруутгаж байна. Энд ямар засвар оруулах ёстой вэ? Эдгээр өөрчлөлтийг оруулахад зардлын тооцоо ямар гарч байна вэ? хэдэн хүний асуудал яригдаж байна вэ?"

УИХ-ын итгэмжлэгдсэн төлөөлөгчөөр ажилласан УИХ-ын гишүүн С.Чинзориг хариуллаа. 

"0-3 нас хүртэлх хүүхдээ эх харж байгаад ажилдаа орлоо гэхэд эхэд өгч байсан тэтгэмжийг үргэлжлүүлэн хүүхдээ харж байгаа эцэгт олгох боломжийг нээж өгөх юм. Эцэг эхийн аль алинд давхардуулан өгөх боломжгүй.

Жилдээ нийт 0-3 насны хүүхдээ асарч байгаа эцэг, эхэд 90 тэрбум төгрөг олгож байгаа."

УИХ-ын гишүүн Ц.Мөнх-Оргил нэмж тодрууллаа.

Сэтгүүлч

Редактор Ц.Соёлмаа soko@vip76.mn