Баянсэлэнгэ.З 2016.05.04 | Сонин: Өнөөдөр сонин

Бүлэг задарлаа гэхэд сонгууль дөхсөн үед тийм ч ач холбогдолтой биш шүү дээ

Бүлэг задарлаа гэхэд сонгууль дөхсөн үед тийм ч ач холбогдолтой биш шүү дээ

Эрүүгийн хэрэг хянан шийдвэрлэх тухай хуулийн төслийг УИХ-ын холбогдох Байнгын хороогоор хэлэлцүүлж эхлээд буй. Хэлэлцүүлгийн үеэр гүйцэтгэх ажиллагаатай холбоотой зарим заалт гишүүдийг талцуулж, төрийн тусгай албаныхан уг асуудлаар Ерөнхий сайдад хандсан. Хууль зүйн байнгын хорооны гишүүн 3. Баянсэлэнгээс уг төсөл болон цаг үеийн асуудлаар байр суурийг нь тодрууллаа.

-Эрүүгийн хэрэг хянан шийдвэрлэх тухай хуулийн төсөл дэх гүйцэтгэх ажиллагаатай холбоотой зүйл, заалтын талаар та ямар байр суурьтай байна вэ?

-Төсөлтэй нарийн танилцаагүй байна. Гэхдээ  Цагдаагийн академид гүйцэтгэх ажиллагааны чиглэлээр суралцсаны хувьд байр сууриа илэрхийлье. Тусгай албаныхан үүнийг эсэргүүцэж байгаа юм билээ. Ер нь бол Гүйцэтгэх ажиллагааны тухай хуулийг шинэчлэх ёстой. Өнөөдөр гүйцэтгэх ажлыг хуулийн дагуу хийж байна уу гэдэгт олон хүн эргэлздэг. Тийм хүмүүсийн нэг нь би. Яагаад гэвэл, бидний албан өрөө, тасалгаанд тагнах, чагнах хэрэгсэл тавиагүй гэдэгт гишүүд эргэлздэг.

Гүйцэтгэх ажлыг хуулийн дагуу явуулах ёстой. Уг ажил төрийн нууцтай холбоотой учраас зарим талаар хэт хаалттай байдаг. Гүйцэтгэх ажлын хүрээнд олж авсан зүйлээ нотлох баримтын хэмжээнд л үнэлээд байдаг. Ямар нотлох баримт олсноо шүүгч нарт л танилцуулдаг. Төрийн эрх барих дээд байгууллагын түвшинд зөвхөн Тусгай хяналтын дэд хороо танилцах эрхтэй. Хөшигний цаана болж буй зүйлүүд хэт их нууцлалтай байна гэдэг. Гэв гэнэт л баригдлаа, илэрлээ, хоригдлоо гэх байдлаар явах нь улстөржсөн нийгэмд өөрийн эрхгүй эргэлзээ төрүүлээд байгаа юм. Түүнээс биш гүйцэтгэх ажлын нууц далд арга хэрэгслээр олсон баримтыг заавал нийтэд ил болго, танилнуул гэх учиргүй. Хамгийн гол нь уг үйл ажиллагаа хуулийн дагуу явж байгаа, эсэхэд ганц прокурор л хяналт тавьж байна. Энд л маргаан бий.

-Уг төсөлд гүйцэтгэх үйл ажиллагааг хууль зүйн асуудал эрхэлсэн сайдын гарт төвлөрүүлэхээр тусгасантай санал нийлж байна уу?

-Шаардлагатай тохиолдолд Хууль зүйн асуудал эрхэлсэн сайд мэдээ, мэдээлэлтэй танилцах боломжтой байх ёстой гэж бодож байна. Цагдаагийн байгууллагын гүйцэтгэх ажиллагааны талаар тодруулахад Хууль байх жишээтэй. Мэдье гэхээр хууль зөрчих гээд байдаг. Сайд нь л төрийн нэрийн өмнөөс тус салбарыг хариуцан чиглүүлж, бодлогоор ханган ажиллаж байгаа шүү дээ.

-Танай бүлгээс дөрвөн ч гишүүн гарах нь гэж зарим эх сурвалж мэдээлжээ. Нэр бүхий гишүүд бүлгийн удирдлагадаа энэ талаар хандсан зүйл байна уу?

-Яриагүй. Одоогоор надад мэдэгдсэн юм алга. Цахим ертөнцөөр бас худлаа мэдээлэл яваад байх шиг. Нөгөө талаас манай бүлгийг задраасай гэж хүсдэг нам, улстөрчид байхыг үгүйсгэхгүй. Бид өнөөдрийг хүртэл дөрвөн жилийн хугацаанд ганц, хоёр гишүүнээ алдсан ч бүлгийн хэмжээнд нэгдээд явж л байна. Асуудлын гол нь бүлэг задрах, эсэхэд байгаа юм биш. Цаана нь буй улс төрийн намын үйл ажиллагаа хэвийн байна. Ээлжит сонгуулиас хоёрхон сарын өмнө бүлэг задарлаа гэхэд сонгууль дөхсөн үед тийм ч ач холбогдолтой зүйл биш шүү дээ. МҮАН-ын гишүүд маань АН-аас нэр дэвшихээр болж байгаа юм билээ. Хоёр намаас бүрдсэн бүлэг хэдий хүртэл оршин тогтнох боломжтой байна, тэр хүртэл нь цул, нэгдмэл байлгахаар ажиллаж байна. Янз бүрийн асуудлаар санал зөрөлдөх үе байдаг ч бидэнд уг асуудлаар маргалдсан зүйл үгүй.