25 сая ам.долларын хөнгөлөлттэй зээлийг Энэтхэгийн Засгийн газар олгохоор боллоо
2009.09.19

25 сая ам.долларын хөнгөлөлттэй зээлийг Энэтхэгийн Засгийн газар олгохоор боллоо

2009 оны 9 дүгээр сар 18-ны өдөр Монгол Улсын Ерөнхийлөгчийн Тамгын газрын дарга Д.Дорлигжав, Ерөнхийлөгчийн зөвлөх Ц.Сүхбаатар, А.Ганбаатар, ГХЯ-ны Азийн газрын захирал Б.Ганболд нар МУ-ын Ерөнхийлөгчийн БНЭУ-д хийсэн Төрийн Айлчлалын талаар хэвлэлийн бага хурал хийх үеэр доорхи мэдээллийг хийлээ.

Монгол Улсын Ерөнхийлөгч Ц.Элбэгдорж Бүгд Найрамдах Энэтхэг Улсын Ерөнхийлөгч Эрхэмсэг хатагтай Пратиба Патилын урилгаар 2009 оны 9 сарын 13-16-ны өдрүүдэд Энэтхэг Улсад төрийн айлчлал хийлээ.

Монгол Улсын Ерөнхийлөгч айлчлалын үеэр Бүгд Найрамдах Энэтхэг Улсын Ерөнхийлөгчтэй уулзаж хоёр талын харилцааны болон бүс нутаг, олон улсын харилцан сонирхсон асуудлаар санал солилцов.

БНЭУ-ын Дэд Ерөнхийлөгч, Гадаад хэргийн сайд нар Монгол Улсын Ерөнхийлөгчид бараалхаж харилцааны тодорхой асуудлуудыг хөндөж ярилцлаа. Мөн төрийн айлчлалын протоколын дагуу Энэтхэгийн парламент дахь сөрөг намын тэргүүн манай Ерөнхийлөгчид бараалхсан.

Монгол Улсын Ерөнхийлөгч Энэтхэгийн Ерөнхий сайдтай өргөтгөсөн хэлэлцээ хийв. Монгол Энэтхэгийн харилцаанд сүүлийн жилүүдэд гарсан ахиц, дэвшилд Талууд сэтгэл ханамжтай байгаагаа энэ үеэр тэмдэглэв. Хоёр тал харилцаагаа “Иж бүрэн” түншлэлийн түвшинд ахиулж гаргахаар тохирлоо. Энэ зорилтыг хангахын тулд харилцаа, хамтын ажиллагаа, түншлэлийн цаашид гүнзгийрүүлэх чиглэлүүдийн талаар ярилцаж тохирлоо. Тухайлбал:

- Хоёр орны хооронд өндөр хэмжээний айлчлалыг байнга солилцох юм. Энэ үүднээс Энэтхэгийн Ерөнхий сайд, Гадаад хэргийн сайдыг Монгол Улсад айлчлуулахаар ярилцав. Ялангуяа ирэх жил тохиох Монгол, Энэтхэгийн хооронд дипломат харилцаа тогтоосны 55 жилийн ойн хүрээнд Энэтхэгийн талаас өндөр хэмжээнд айлчлал хэрэгжүүлнэ гэж найдаж байна. Монгол Улсын Гадаад хэргийн сайд 2010 онд Энэтхэг Улсад айлчлал хийнэ.

- Хоёр тал түүнчлэн Хамтын ажиллагааны хамтарсан хорооны дараагийн хуралдааныг Шинэ Дели хотноо энэ оны эцсээр зохион байгуулахаар тохиролцсон. Үүгээр харилцааны тодорхой асуудлуудыг нарийвчлан ярилцаж, хэрэгжилтийг зохион байгуулах юм.

- Монгол Улсын эдийн засгийн тогтворжилтод зориулж 25 сая ам.долларын хөнгөлөлттэй зээлийг Энэтхэгийн Засгийн газар олгохоор болж энэ тухайн хэлэлцээрт хоёр орны Гадаад хэргийн сайд нар гарын үсэг зурлаа.

- Энэтхэг Улсын Эдийн засаг, техникийн хамтын ажиллагааны Монголд хэрэгжиж буй хөтөлбөрийн цар хүрээг цаашид нэлээд өргөтгөхөөр айлчлалын үеэр тохирлоо. Эдүгээ жилд Энэтхэгийн Засгийн газрын тэтгэлгээр Монголоос жилд 30 оюутан, магистерыг Энэтхэгийн их дээд сургуульд элсүүлэхийн зэрэгцээ, 60 мэргэжилтнийг Энэтхэгт дадлага дамжаанд хамруулж байгаа. Энэ тоог 2 дахин өсгөж 120-д хүргэхээр боллоо.

- Цөмийн эрчим хүчийг энх тайвны зорилгоор ашиглахад хамтран ажиллах тухай Засгийн газрын холбогдох агентлаг хоорондын харилцан ойлголцлын санамж бичигт айлчлалын үеэр гарын үсэг зурлаа. Энэ нь эрчим хүч, эрдэс баялгийн салбарт урт хугацааны, харилцан ашигтай хамтын ажиллгааны суурь тавигдаж буй хэрэг юм. Мөн коксжих нүүрс, ган үйлдвэрлэл зэрэг чиглэлийн хамтын ажиллагааг сонирхож буй Энэтхэгийн компаниуд байна.

- Соёл, боловсролын салбарын хамтын ажиллагаа ч цаашид өргөжинө. Тухайлбал, хамтарсан сургуулийн зориулалтаар Улаанбаатар хотноо сургуулийн барилга барихад Энэтхэгийн тал тусламж үзүүлэх юм.

- Айлчлалын үеэр мэдээллийн технологийн салбарын харилцааг дорвитой өргөжүүлэх, үүний дотор софтвэр, аутсорсингийн хамтарсан төв Монголд байгуулах, манай төрийн байгууллагуудын интэрнэтийн сүлжээний аюулгүй байдлыг хангах төв байгуулах зэрэг чиглэлээр хамтран ажиллах талаар зарчмын тохиролцоонд хүрлээ.

- Хоёр тал бүс нутгийн болон олон талын асуудлаар ижил төсөөтэй үзэл бодолтой байлаа. Ази Номхон Далайн бүс нутгийн энх тайван, тогтвортой байдалтай хоолбоотой асуудлууд, үүний дотор АСЕАН-ы бүсийн форум (ARF), Ази Европын уулзалт (ASEM) зэрэг олон талын бүтцэд хоёр тал хамтарч, ажиллагаагаа эрчимжүүлэхэд бэлэн байгаагаа давтан тэмдэглэв.

- НҮБ-ын Аюулгүйн Зөвлөлийг өргөтгөх үед Энэтхэг Улсыг байнгын гишүүнээр сонгохыг Монгол Улс бүрэн дэмжиж байгаагаа дахин нотлов. Энэтхэг Улсын Засгийн Газар энэхүү дэмжлэгийг илэрхийсэнд, түүнчлэн Энэтхэг Улсыг дэмжиж, 2011-2012 оны байнгын бус гишүүний сонгуульд нэр дэвшигчийн хувьд Энэтхэг Улсыг дэмжсэнд Монгол Улсын Засгийн газарт талархал илэрхийлсэн.

- Монгол Улс, Энэтхэг Улс олон улсын терроризмын аюул занал, түүний эсрэг тэмцэх шаардлагын талаар ижил төсөөтэй байр суурьтай байлаа. Терроризмийн эсрэг нийтийн зөвшилцөл хийгээд хуулийн горимыг чангатгах, үүний дотор Олон улсын терроризмын эсрэг цогц конвенцийг аль болох ойрын ирээдүйд эцэслэхийн төлөө ажиллах шийдвэр төгс байгаагаа хоёр тал батлан илэрхийлэв.

- Ерөнхийлөгч айлчлалынхаа хөтөлбөрийн хүрээнд Бихар муж Гаяа хотод байдаг Бурхан багшийн гэгээрсэн ариун дагшин Бодигаяа сүмд зочилсон. Мөн тэнд баригдаж буй Монгол сүмийн барилгын явцтай танилцсан.

- Ерөнхийлөгч мөн Мумбай хотноо зочилж, айлчлалыг тохиолдуулан тэнд зохиогдсон Монгол, Энэтхэгийн бизнесийн форумын нээлтэд оролцсон. Хоёр талын бизнесийнхэн хамтран ажиллах боломж чиглэлийн талаар санал солилцсон юм. Энэ арга хэмжээнд хоёр талаас 100 гаруй бизнесийн төлөөлөгчид оролцсон юм.

- Айлчлалын үеэр, түүнчлэн:
(1) Эрүүл Мэндийн салбарт хамтран ажиллах тухай хэлэлцээр

(2) Статистикийн салбарт хамтран ажиллах тухай санамж бичиг

(3) 2009-2012 оны Соёлын солилцооны хөтөлбөрт тус тус гарын үсэг зуран тухайн салбаруудад харилцаа, солилцоог өргөтгөх эрх зүйн үндсийг бүрдүүлж өглөө.

Айлчлалын дүнгээр хамтарсан тунхаглал гарсан болно.

0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.