УИХ-ын Аюулгүй байдал, гадаад бодлогын байнгын хороо өчигдөр үдээс өмнө хуралдлаа.

Хуралдаанаар хоёр асуудлыг хэлэлцсэн бөгөөд эхэнд нь Цөмийн энергийн тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийлээ. Ингэснээр уг хуулийн төслийг чуулганы нэгдсэн хуралдаан оруулахаар болсон юм.

Үүний дараа нэгдсэн үндэсний байгууллагын “Хүүхдийн эрхийн конвенцийн Мэдээлэл хүргүүлэх журмын тухай нэмэлт протокол”-д гарын үсэг зурах эрхийг Засгийн газарт олгохыг дэмжих асуудлаар санал хураалт явуулсан юм. Саналыг хуралдаанд оролцсон гишүүд дэмжсэн билээ.

Монгол Улс 1990 онд НҮБ-ын Хүүхдийн эрхийн тухай конвенцийг соёрхон баталж, улмаар “Хүүхдийг худалдах, хүүхдийн биеийг үнэлэх, хүүхдийг садар самуунд сурталчлахын эсрэг” Нэмэлт Протоколд 2003 онд, “Хүүхдийг зэвсэгт мөргөлдөөнд оролцуулахын эсрэг” Нэмэлт Протоколд 2004 онд тус тус нэгдэн оржээ.

Хүний эрхийн чиглэлээр олон улсын бүх гэрээ конвенцд нь тухайн гэрээ конвенцийн зүйл заалтыг зөрчсөн улс орнуудаас гомдол хүлээн авч, хянан хэлэлцэх журамтай байдаг гэнэ. Харин Хүүхдийн эрхийн конвенци нь ийм механизмгүй гэрээ байсан тул НҮБ-ын Ерөнхий Ассамблейн 2011 оны 12-р сарын 19-ний өдрийн хуралдаанаар “Мэдээлэл хүргүүлэх журмын тухай Нэмэлт протоколыг баталж, 2012 оны хоёр- дугаар сарын 28-ны өдөр Женев дэх НҮБ-ын Хүний эрхийн хороо гишүүн орнуудаас гарын үсэг зурах, соёрхон батлах ажиллагааг албан ёсоор эхлүүлсэн түүхтэй.

НҮБ-ын Ерөнхий Ассамблейн ээлжит чуулган 2013 оны есдүгээр сарын 24-26, есдүгээр сарын 30- наас аравдугаар сарын нэгний өдрүүдэд болох бөгөөд уг арга хэмжээгээр Монгол Улсыг “Хүүхдийн эрхийн конвенцийн Мэдээлэл хүргүүлэх журмын тухай 3 дугаар нэмэлт протокол”-д гарын үсэг зурахыг уриалсан захидлыг уг нэмэлт протоколыг соёрхон батлахын төлөөх Олон улсын эвслээс ирүүлсэн байна. Протоколд одоогоор найман улс нэгдэн орж, 42 улс гарын үсэг зураад байгаа бөгөөд 10 улс тус протоколд нэгдэн орсноор хүчин төгөлдөр болох юм байна.

Цөмийн энергийн тухай хуулийг ээлжит чуулганаар хэлэлцэнэ