Өнөөдөр /2017.11.17/ УИХ-ын нэгдсэн чуулганаар Банкны тухай хуульд нэмэлт өөрчлөлт оруулах тухай хуулийн төслийг хэлэлцэх эсэхийг хэлэлцлээ.

Хэлэлцэж буй асуудалтай холбогдуулан УИХ-ын гишүүн Ж.Энхбаяр горимын санал хэлэв.

Ж.ЭНХБАЯР: ИРЭХ ЖИЛҮҮДЭД ӨРИЙН НАМАГТ ГҮНЗГИЙ ШИГДЭХ НӨХЦӨЛ БАЙДАЛ ҮҮССЭН

Өнөөдөр зайлшгүй бий болсон санхүүгийн хүндрэлийг шийдэхийн тулд Монголбанкны тухай хуульд бүтцийн томоохон өөрчлөлт оруулж байгаа.

Монголбанкны эрхийг нэмэх, арилжааны банкинд эрх хүлээн авагчийг томилох, болзолт нөхцлийн удирдлагыг тэнд ажиллуулах, бүрэн эрхт төлөөлөгчийн эрх үүргийг нэмэгдүүлэх, банкын бүтцийн өөрчлөлтийн арга хэмжээг хэрэгжүүлэх, банкыг бусдад шилжүүлэх зэрэг нарийн ажлууд тусгасан байна.

Яагаад энэ асуудал үүссэнийг УИХ маш сайн ярилцах ёстой. Үүн дээр нээлттэйгээр биш хаалттай горимд шилжүүлээд Монголбанкны ерөнхийлөгчийн үгийг сонсож, эдийн засгийн нөхцөл байдал ямар байгаа талаар хэлэлцэх хэрэгтэй.

Ингэж ажил хэрэгчээр, улстөржилгүйгээр, алсыг харсан зайлшгүй ирж байгаа хүнд цохилтуудыг ухаалаг тойрч, давж гарах бодлогыг гаргах ёстой. Энэ бодлогын үүднээс энэ хуульд өөрчлөлт орж байна.

Сая бид жижиг зээлийг том зээлээр төлж аргаллаа. Ирэх 2020-2023 онд эдийн засгийн хүнд нөхцөл байдлууд үүсэх нь тодорхой. Бидний олж авсан зээлийн эргэн төлөлт энэ үед шахагдана. Хятадын Cihna банкнаас авсан своп хэлэлцлүүд 2020 он гэхэд тулж ирнэ. Сая батлагдсан төсөв 1 тэрбум долларын алдагдалтай.

Ирэх 2 жил том өрөөс илүү том өр лүү шилжиж, өрийн намагт гүнзгий шигдэх нөхцөл байдал үүссэн.

Өнгөрсөн хугацаанд явсан барилгын салбарын хэт хөөргөлт, бодлогогүй үйл ажиллагаатай холбоотойгоор олон мянган барилга борлуулалтгүй болсон. 80 гаруй мянган иргэдийн авсан моргэйжийн зээл авсан өртгөө эргэн төлөх нь утгагүй болсон. Моргэйжийн бодитой хямрал бидэнд нүүрлэсэн. Үүнийг даван гарахын тулд Монголбанкны эрх үүргийг эрс нэмэгдүүлэх, урьдчилан сэргийлэх, яаралтай арга хэмжээ авах бүрэн эрхийг нэмэгдүүлэх шаардлага байгаа гэж үзэж байна. Тийм болохоор энэ хуулийн санаачлагчдын нэг болж орж байна. Арилжааны банкуудын зээлийн хүүний дээд хязгаарыг Монголбанк тогтоох бүрэн эрхийг өгөх ёстой.

Үүнийг улстөржилгүйгээр хаалттай горимд шилжүүлж өгөөч ээ гэж хүсье.

Ж.Энхбаяр: Улстөржилгүйгээр хаалттай горимд шилжүүлж экспертүүдийн үгийг сонсох ёстой