Хүн төрөлхтний шившиг болсон боолчлол орчин үед ч арилаагүй хэвээр. Интерпол 12-р сарын 20-нд Африкийн Габон улсад боолчлогдсон 140 хүүхдийг сулласны дунд 6 настай хүүхдүүд ч байлаа. Одоо чөлөөлөгдсөн хүүхдүүд асрах газарт амьдарч байна. Гэмт бүлэглэлүүд тэднийг зарцалж, зах дээр хар ажилчин, ачигч хийлгэдэг байжээ. Мафийнхан тэдгээр хүүхдийг ядуу, хөрш орнуудаас эцэг эхээс нь худалдан авдаг эсвэл шууд хулгайлаад дараа нь Габоны нийслэл Либревилльд аваачдаг аж.

Чухам яагаад Габон улс боолын худалдааны төв болов? Яагаад гэвэл энэ улс нефть, байгалийн хийн болон марганц, ураны хүдрийн асар баялаг орд газруудтай бөгөөд нэг хүнд ногдох орлогоор зөвхөн Экваторийн Гвиней, Сейшелийн арлуудын дараа ордог. Габоны нэг хүнд  ногдох орлого 2009 оны байдлаар 13,9 мянган долларт хүрчээ. Албан бус эх үүсвэрээс үзэхэд энэ улс төдийгүй боолчлолыг саяхан халсан улс орнуудад ч боолын наймаа хөгжин цэцэглэсээр байна. Жишээлбэл Мавритан улс албан ёсоор 1980 онд боолчлолыг халсан. Гэтэл энд олон зүйл урьдын адил хэвээр, боолчуудыг хэлбэр төдий чөлөөлсөн ч тэд хаашаа ч явах аргагүй учраас эзнийхээ гарт хуучин шигээ амьдарсаар байна.

Нигер улс боолгүй болсноо албан ёсоор 1995 онд зарласан. Гэтэл боолчлолын эсрэг тууштай тэмцдэг “Timidria” байгууллагын мэдээгээр 2003 онд энэ улсад 870 000 боол байлаа. Эндхийн боолын худалдааны гол зуучлагчид нь туаре омгуудын удирдагчид гэнэ.

Хэдийгээр Нигерийн Засгийн газар эрс няцааж байгаа ч өнөөдөр Нигерт боолчлол байсаар байна. “Timidria”-ийн мэдээгээр энд дор хаяж 43 000 хүн боолын байдалд амьдардаг бөгөөд тэдний ихэнх нь "садако" буюу секс боолууд гэнэ. “Timidria” байгууллага тус улс даяар сүлжээ оффис байгуулсан бөгөөд эндээ оргодол боолуудыг хоргодуулж, тусалж дэмжих зэргээр боолчлолтой тэмцдэг. НҮБ, хууль сахиулах байгууллагуудын мэдээгээр Судан, Сомали, Анголд ч байдал маш хүнд байгаа аж.

Оросын судлаач С.Карамаев “Хэдийгээр дэлхийн нэг ч улс орон боолчлол байхгүй гэж албан ёсоор мэдэгддэг ч энэ нь зөвхөн цаасан дээр л хэрэгждэг. Ялангуяа зөрчил, цэргийн мөргөлдөөнтэй Конго, Съерра-Леонд ийм үзэгдэл их ажиглагддаг аж. Бараг бүх дайтагч талууд боолуудын хөдөлмөрийг мөлжихөөс буцдаггүй. Жишээлбэл Родезийн дайны үеэр алдарт “Зүүн Өмнөд Африкийн ард түмнүүдийн байгууллага”- ын /South-West Africa People s Orgaizatio/ партизанууд ч боолуудыг ашиглаж байсан юм.

Тэрчлэн гуравдагч ертөнцийн орнуудад ч боолууд бий. Пакистан, Энэтхэг, Шри-Ланк, Непал, Бирм зэрэг Өмнөд болон Зүүн Өмнөд Азийн орнуудад боолын бүх төрлийн хэлбэр цэцэглэж байна. Тэрчлэн ийм үзэгдэл Ойрхи Дорнод, Латин Америкт ч өргөн түгжээ.

Холын Африк байтугай манай оронд ч секс боолуудын тухай мэдээ үе үе цацагдахад хүмүүс нэг их гайхахаа больсон. Тэгэхээр боолчлол бүх тивд байдаг гэж болно. Зөвхөн Антарктид л байхгүй.

Дэлхий дахин 12-р сарын 2-нд Боолчлолыг халах олон улсын өдрийг албан ёсоор тэмдэглэдэг билээ. Энэ өдрийг тохиолдуулан байдал маш ноцтой байгаа талаар НҮБ-ын Ерөнхий нарийн бичгийн дарга Пан Ги Мүн ил тодоор мэдэгдлээ. Тэрээр “Хүн төрөлхтөн одоогоор энэ шившигт үзэгдлээс ангижирч чадаагүй. Даяаршил харин ч бүр амь орууллаа. Юуны өмнө нийгмийн ядуу, бусдад гадуурхагдсан давхаргынхан, үндэстний цөөнх, цагаачид боолчлолын золиос болж байна” хмээн хүлээн зөвшөөрлөө.

Боолчлолын эсрэг тэмцдэг төрийн бус олон байгууллага бий. Тухайлбал “Association for Community Development” (Бангладеш), “Bonded Liberation Front” (Энэтхэг), “Anti-Slavery International” (АНУ).

Соёл иргэншлээрээ гайхуулдаг Европ тивд ч боолууд бий, энд 400 000-гаас 1 сая хүн боолчлогдож байна. Юуны өмнө энд секс боолууд орно. Гэмт бүлэглэлүүд голдуу тэднийг хууран мэхэлж, торондоо оруулдаг. Тэрчлэн АНУ, Израиль, Турк, Хятад, Хонконгт ч ийм үзэгдэл газар авсан. Бага насны охидыг боолын худалдаачдаас эсвэл эцэг эхээс нь худалдан авдаг бол насанд хүрсэн хүмүүсийг загварын болон ажилчин зуучлагч агентлагуудаар дамжуулан наймаалцах буюу хүч хэрэглэн хулгайлдаг аж. Иймээс боолчлол хэмээх шившигт үзэгдэл арилтлаа өдий байна.

Орчин үеийн боолуудыг хэдэн ангилалд хувааж болно.

1. Комбатант буюу цэрэг, дайны ажиллагаанд оролцогчид. Тэд зэр зэвсэг, буу сумыг зөөж өгөхөөс гадна өөрсдийг нь хулгайлсан хүмүүсийн талд хүчинд автан тулалддаг.  Жишээлбэл Угандагийн газар нутаг дээр “Бурхныг аврах арми” ийм боолуудын хүчийг ашиглан тулалддаг.
2. Боолуудын өөр нэг ангилал бол үйлчилгээний ажилчид. Тэд хоол унд хийж, угаалга цэвэрлэгээ хийдэг.
3. Секс боолууд
4. Ажилчид. Тэднийг төв газраас зайдуу, бөглүүд газарт тусгай хашаа хороонд, хүчлэн хамгаалалтын дор ажиллуулдаг. Уул уурхай, алт зэрэг ямар нэг түүхий эд олборлодог орд газруудад бага насны хүүхдүүдийн хөдөлмөрийг мөлжих үзэгдэл түгээмэл байна. Зарим орд газар нь өрнөдийн хөгжингүй орнуудын биенесмэний өмч байх нь цөөнгүй.

Өнөөдөр олон улсын хууль сахиулах байгууллагуудын мэдээгээр дэлхийд 30 сая хүн боолчлогдож байгаа аж. Боолчлол устахгүй байгаа гол шалтгаан нь хүний наймаанаас олох ашиг орлого нэмэгдэхийн хэрээр боолын өртөг буурдагтай холбоотой гэж шинжээчид үзэж байна. НҮБ-ын үнэлгээгээр боолуудыг зөвхөн дамжуулан зарсан орлого жилд 7 тэрбум долларт хүрдэг гэнэ. Жишээлбэл нэг боол бүсгүй эзэддээ сар бүр 7000 доллар авч ирдэг аж.