УИХ-ын ээлжит бус чуулганы өнөөдрийн \2020.08.20\ нэгдсэн хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэлийг батлах тухай тогтоолын төслийг хэлэлцэж байна.

“Монгол Улсыг 2021-2025 онд хөгжүүлэх таван жилийн үндсэн чиглэл” нь Үндэсний нэгдмэл үнэт зүйл, Хүний хөгжил, Амьдралын чанар ба дундаж давхарга, Эдийн засаг, Засаглал, Ногоон хөгжил, Амар тайван, аюулгүй нийгэм, Бүс, орон нутгийн хөгжил, Улаанбаатар ба дагуул хот гэсэн 9 бүлэг, 47 зорилттой. Энэ хүрээнд 2021-2025 онд хэрэгжүүлэх бодлогын зорилго, зорилт, хүрэх үр дүн, хэрэгжилтийн хяналт-шинжилгээ, үнэлгээний шалгуур үзүүлэлт, зорилтот түвшинг тодорхойлжээ.

Хэлэлцэж буй асуудалтай холбоотойгоор УИХ-ын гишүүд асуулт асуулаа.

УИХ-ын гишүүн Ц.Даваасүрэн:

“Таван жилийн гэж байгаа нь оныхоо нэрийг хэлээд байна уу? бодлого төлөвлөлтөө хэлж байна уу? 5 жилийн хугацаан дахь бодлого төлөвлөлтөө хэлж байвал 4 жилийг нь одоогийн Засгийн газар бүрэн эрхийнхээ хүрээнд хэрэгжүүлье. Үлдсэн 1 жилийг нь хэрвээ 2024 онд улс төрийн өөр хүчин гараад ирвэл тэд хэрэгжүүлэх үү гэдэг асуудал үүснэ. Нэг бол 2024 оны сонгуульд оролцох намууд үлдсэн 1 жилийн төлөвлөсөн ажлыг хэрхэн хэрэгжүүлэх вэ гэдгээ мөрийн хөтөлбөрөө боловсруулаад өрсөлдөх юм уу? энийг хэрхэн ойлгох ёстой вэ?

Хэрвээ бодлого төлөвлөлт явж байгаа бол 10 жилээр гаргаад улс төрийн намууд сонгуульд оролцохдоо яаж хэрэгжүүлэх вэ гэдгийг тусгах талаасаа боловсруулах ётсой байх. Манайд цоо шинэ хөгжлийн бодлого оруулаад ирж байна. Өнгөрсөн хугацаанд бодлого төлөвлөлтийн хуулиуд хэрэгжээгүй нь л энэ л дээ. Сүүлийн үед энэ талаар ярьж байгаад олзуурхаж байна.

Бидэнд бодлого төлөвлөлт хийх бүтэц байхгүй. Ажлын хэсэг гэхээр яамдаас хэдэн хүн цуглаад бодлого төлөвлөлт хийж байгаа бол өөрийгөө хуурч байгаа хэрэг шүү. Хуучин төлөвлөгөө уэдийн засгийн улсын хороо байсан шиг байнгын бүх салбарын шилдэгүүд орсон орон тооны бүтцээр үүнийг хийдэг юм. Одоогийн бидний бодлого төлөвлөлт орон тооны бус ажлын хэсгийн хэмжээнд хийгдээд байгааг засах ёстой.

Хамгийн гол нь хөгжлийн загвараа бий болгох ёстой. 90-ээд оны үед ХААХҮ-ийн орон гэж байсан. Энэ их тохиромжтой байсан. Эдийн засгийг хамруулахгүй байх арга зам нь энэ салбар ч байх боломжтой.

АН-ынхан эдийн засгийн уналтын үед бид таардаг гэж хэлдэг. Одоо тэгвэл бид ийм сорилтын 4 жилтэй нүүр тулж байна. Анхааралтай хандаж эдийн засгийн төлөвлөлт дээрээ маш сайн анхаарайх ёстой. Эдийн засгийн уналтын цикль л биднийг шалгаж магадгүй. Гол орлого олж байгаа Оюутолгойг яриад байна шүү дээ. Дубайн гэрээг хуульд нийцүүлж сайжруул гэдэг дотор хуульд нийцэхгүй бол хүчингүй болго гэдэг утга ч орж байгаа шүү дээ. Одоо УИХ энийг сайжруулах ёстой гээд байх юм. Үүнд цуцлах ч асуудал орно. Гол орлогын эх үүсвэрүүдээ анхарахгүй бол болохгүй. Тиймээс УИХ-аар ам тагладаг байдал руу орж байна.”

Түүний асуултад УИХ-ын гишүүн, ЗГХЭГ-ын дарга Л.Оюун-Эрдэнэ хариуллаа.