УИХ-ын 2024.10.18-ны өдрийн хуралдаанаар Монгол Улсын 2025 оны төсвийн тухай хуулийн анхны хэлэлцүүлгийг хийсэн. Хэлэлцүүлгийн үеэр хөрөнгө оруулалт, түүний эх үүсвэр, төсвийн зардалтай холбоотой асуудлууд ихээхэн анхаарал татаж байлаа.

Ялангуяа Засгийн газраас 14 мега төсөл хэрэгжүүлнэ гэж байгаа ч хөрөнгө оруулалтыг хэрхэх болон жилийн төсөвтэй хэрхэн уялдуулах зэрэг нь тодорхойгүй. Мөн жилийн төлөвлөгөөндөө захирагдаж төсөв яригдах ёстой атал төсөвтөө тааруулан төлөвлөгөөг хэлэлцэж байгаа нь учир дутагдалтай байна гэдэг шүүмжлэлүүдийг дагуулав.

Төсөв батлах нэг хэрэг. Харин төсвийн хөрөнгө оруулалтыг зохистойгоор шийдэхгүй бол талаар хэрэг болно. Тиймээс УИХ-ын гишүүн Б.Мөнхсоёл төсвийн хөрөнгө оруулалт, төсвийн алдагдлыг хэрхэн бууруулах талаар өөрийн байр суурийг илэрхийлсэн юм.

Тэрээр, “Төрийн оролцоог багасгах, төсвийн сахилга батыг нэмэгдүүлэх талын мэдлэг мэдээллийг зөвхөн иргэдэд бус УИХ-ын гишүүдэд ч өгөх зайлшгүй шаардлагатай байгаа нь ирэх оны Төсвийн тухай хэлэлцэж байхад анзаарагдлаа. Төсвийн хөрөнгө оруулалтын тухай хуулийг тусад нь хууль гаргаж боловсруулах. Түүн дотроо тендертэй холбоотой алив барилга байгууламжийг захиалга, гүйцэтгэх асуудлыг тусад нь хариуцах хөрөнгө оруулалтын тусгай агентлаг юм уу корпораци байгуулах нь зөв гэсэн Төсвийн тогтвортой байдлын зөвлөлийн гаргасан шийдвэрийг би дэмжиж байгаа. Үүнийг Сангийн сайд ч дэмжсэн байна билээ. Яагаад гэвэл гол асуудал нь дандаа хөрөнгө оруулалтын төслүүд түүний эрэмбэ, координацийн (хяналт, зохицуулалт) асуудалтай их холбогдож гарлаа.

Төсвийн алдагдлыг бууруулах боломж их байна. Жишээ нь, төрийн албан хаагчийн буруутай үйл ажиллагааны үр дүнгээс үүссэн нөхөн төлбөрийн хэмжээ 4 дахин өсөөд 17.2 тэрбум төгрөг байна. Гэтэл бүр 34 тэрбум төгрөгөөр төсөвлөгдсөн байна. Үүнийг багасгаж болно шүү дээ. Үүнийг холбогдох сайд болон бусад хүмүүс анхаарч ажиллах хэрэгтэй байна.” Гэлээ.