Баян-Өлгийн аймгийн Алтанцөгц суманд Улсын төсвийн 2.7 тэрбум төгрөгийн хөрөнгө оруулалтаар баригдсан, орчин үеийн шаардлагад бүрэн нийцсэн 100 хүүхдийн дотуур байр ашиглалтад орлоо.

Шинэ дотуур байр нь бие засах өрөө, душ, номын сан зэрэг хэрэгцээт бүх өрөө тасалгааг төлөвлөж, сурагчдын тав тухтай орчинд амьдрах, суралцах нөхцөлийг бүрдүүлсэн нь онцлог юм.

Ташрамд дурдахад, УИХ-ын гишүүн Т.Аубакир 2020 онд анхны томилолтоороо Алтанцөгц суманд ажиллах үеэр тус сумын 1983 онд ашиглалтад орсон, хуучирч муудсан дотуур байрны нөхцөл байдалтай танилцаж, шинэ дотуур байр барих асуудлыг тухайн үеийн сумын удирдлагуудтай хамтран шийдвэрлэхээр ажилласан.

Энэхүү хамтын ажиллагааны үр дүнд Улсын төсвөөс хөрөнгө шийдвэрлэгдэж, өнөөдөр орчин үеийн шаардлагад нийцсэн шинэ дотуур байр ашиглалтад орж байгаа юм.