Монгол хүний амьдралын чанарыг дээшлүүлэх, хүн амын өсөлтийг дэмжих асуудлаар холбогдох хууль тогтоомжийн хэрэгжилтийг эрчимжүүлэх, үр нөлөөг дээшлүүлэх асуудлыг судалж, цаашид авах арга хэмжээний талаар санал, дүгнэлт танилцуулах, шаардлагатай бол холбогдох хуулийн төсөл боловсруулах үүрэг бүхий УИХ-ын дэргэдэх ажлын хэсгийн ахлагчийн хувиар НҮБ-ын Монгол дахь Хүүхдийн сангийн Суурин төлөөлөгч Эваристе Коуасси Комлантай уулзаж, төрөлт, хүүхэд хамгаалал, амьдралын чанар, эрүүл мэнд зэрэг хүн амын өсөлтийг дэмжих бодлогод хамаарах олон салбар чиглэлээр ярилцлаа.

Уулзалтын үеэр УИХ-ын гишүүн Д.Үүрийнтуяа “Хүн ам цөөтэй манай улс хүн амын өсөлтийг үндэсний аюулгүй байдлын хэмжээнд анхаарах учиртай хэмээн үздэг хүний хувьд Монгол Улсынхаа хүн амын өсөлтийг дэмжих бодлогыг боловсронгуй болгоход онцгой анхааран ажиллаж байгаа, манай ажлын хэсгийн зорилго ч мөн үүнд чиглэгдэж байгаа. Тиймээс ажлын хэсэг, НҮБ-ын Монгол дахь Хүүхдийн сангийн хамтын ажиллагаа үр дүнтэй байна гэдэгт итгэл дүүрэн байгаа”-гаа уламжиллаа.

Суурин төлөөлөгч Эваристе Коуасси Комлан “Монгол Улс сүүлийн жилүүдэд хүүхдийн эндэгдлийн чиглэлээр зоригтой алхмууд хийж чадсан. Хүн амын өсөлтөд хүүхдийн эрүүл мэндээс гадна төрөлт, амьдрах орчин зэрэг олон хүчин зүйл нөлөөлдөг бөгөөд бид тодорхой чиглэлүүдэд судалгаанууд хийж ирсэн, мөн хийхээр төлөвлөсөн төсөл ажлууд байгаа. Энэ судалгаа, ажлууд дээрээ бид та бүхэнтэй хамтран ажиллахдаа таатай байх болно. Мөн таны дурдсан хүн амын өсөлтийг дэмжих бодлогыг боловсронгуй болгох, хууль эрх зүйн орчныг сайжруулах тал дээр бид дэмжин ажиллах болно” хэмээн ярилаа.

Сэтгүүлч

Сэтгүүлч Б.Хонгорсайхан