УИХ-ын чуулганы /2025.04.10/-ны өдрийн хуралдаанаар Монгол Улсын Ерөнхий прокурорын албан тушаалд Банзрагчийн Жаргалсайханыг томилох асуудлыг Улсын Их Хуралтай зөвшилцөхөөр ирүүлсэн Ерөнхийлөгчийн саналыг хэлэлцэж байна.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн Ж. Батжаргал:

Монгол Улсын Ерөнхийлөгчөөс өөрт олгогдсон бүрэн эрхийнхээ хүрээнд УЕП-оор улируулан томилж, ажиллуулах талаар УИХ-тай зөвшилцөхөөр Б.Жаргалсайхан прокурорыг оруулж ирж байна. Хуульч, гишүүд маань асуулт асууж, санал хэллээ. Аль болохоор би давхцалыг арилгая. Б.Жаргалсайхан прокурорыг дэмжиж байгаа. Дэмжихийн учир юунд байна гэвэл,

Нэгдүгээрт, прокурорын орон нутгийн байгууллагаас ажлын гараагаа эхэлж, 37 жил энэ байгууллагадаа ажиллаж, Ерөнхий прокурор хүртэл өсөн дэвшиж ажилласан байна. Тийм учраас прокурорын байгууллага, түүний чиг үүргийг хэрэгжүүлэх эрх, зүйн орчныг том дүр зургаар нь бүрэн харж чадах, мэргэжлийн ур чадвар, ёс зүй төлөвшсөн хүн юм байна. Хоёрдугаарт, хэн нэгний нөлөөнд автаад байхааргүй хараат бусаар ажиллах "хуульч" хүний хат, үнэт зүйлд суусан хүн юм байна. Тиймээс энэ хүнийг улираан томилох саналыг дэмжих ёстой.

Гуравдугаарт, Эрүү зөрчлийн хууль тогтоомжийг улсын хэмжээнд нэг мөр хэрэгжүүлэх чиг үүрэгтэй байгууллага. Тийм учраас энэ чиглэлийн эрх зүйн орчныг урьдчилан сэргийлэх гэдэг юм уу, ухамсар төлөвшлийнх нь асуудал хүмүүст хэрхэн суухаар эрх зүйн орчин байна вэ? Үүнийг боловсронгуй болгох чиглэлд цаашид юунд анхаарах ёстой вэ.

Аливаа хууль тогтоомж гэдэг нийгмийн харилцаа зохицуулахаасаа гадна урьдчилан сэргийлэх эсвэл төлөвшлийн гэдэг юм уу үр нөлөө нь явах ёстой. Энэ талаасаа ер нь ямар байгаа бол?

Шүүн таслах ажиллагааны хүмүүжлийн үр нөлөө гэж дээх нь үед их ярьцгаадаг байсан. Одоо төрийн нэрийн өмнөөс энэ чиглэлийн үйл ажиллагаанд оролцож байгаа үндсэн чиг үүрэгтэй нь танай байгууллага. Тиймээс шүүн таслах ажиллагааны үйл явц, түүний нөлөөллийн тал дээр таны байр суурь, бодол ямар байна вэ?

Түүний асуултад, УЕП Б.Жаргалсайхан хариуллаа.