2010 оны 12 дугаар сарын 2 ны өдөр нийслэлийн Хан-Уул дүүргийн нутаг дэвсгэр Буянт-Ухаад баригдсан шинэ спорт цогцолборыг хүлээн авах ажиллагаа ёслол төгөлдөр боллоо. Ёслолын ажиллагаанд Монгол улсын Ерөнхий сайд С.Батболд тэргүүтэй хүндэт зочид, албаны хүмүүс, соёл урлагийн болон тамирчид, иргэдийн төлөөлөл хүрэлцэн ирсэн байлаа.

УИХ-ЫН ГИШҮҮН, ЗАСГИЙН ГАЗРЫН ГИШҮҮН, ЭРҮҮЛ МЭНДИЙН САЙДС.ЛАМБААГИЙН ХЭЛСЭН ҮГ

Монгол Улсын Ерөнхий сайд аа,

УИХ-ын гишүүд,

Засгийн газрын гишүүд ээ,

БНХАУ-аас Монгол улсад суугаа Онц бөгөөд Бүрэн Эрхт Элчин сайд аа,Эрхэмсэг хатагтай, ноёд, хүндэт зочид, дасгалжуулагчид, тамирчид аа,Хоёр жилийн өмнө БНХАУ, Монгол Улсын Засгийн газар хоорондын хэлэлцээрийн дагуу БНХАУ-ын 111 сая юаны буцалтгүй тусламжаар 5045 хүний суудалтай спорт цогцолборыг Хятадын “Шанхай” групп барьж эхэлсэн билээ. Хоёр жилийн дотор 2950 м2 талбайтай, 134 өрөө тасалгаатай хэвлэл мэдээллийн болон цахилгаан, цэвэр ус, агааржуулалтын орчин үеийн тоног төхөөрөмжөөр иж бүрэн тоноглогдсон олон улсын болон дэлхийн зиндааны тэмцээнийг зохион байгуулах хүчин чадалтай орчин үеийн спортын цогцолборыг өнөөдөр Та бид хүлээн авахаар хуран цуглаад байна. Тус цогцолборын цахилгааны шугам, дизель станц, цэвэр, бохир усны шугам, 1000 автомашины зогсоолыг Монголын компаниуд гүйцэтгэж байна. Тус цогцолборт БНХАУ-ын тусламжаар олон арван спортын хэрэглэл, тоног төхөөрөмж нийлүүлсэн болохыг онцлон тэмдэглэж байна. Олимп, дэлхийн, тивийн аваргуудаар эгнээгээ тэлсэн Монголын тамирчдын ирээдүйн амжилтад энэхүү ордон чухал үүрэг гүйцэтгэх болно.Эрхэм зочид, төлөөлөгчид өө,Монгол Улсын нийслэл Улаанбаатар хотын Хан-Уул дүүргийн Буянт-Ухаад баригдсан “Спортын цогцолбор”-ыг хүлээн авах ёслолын ажиллагааг нээснийг мэдэгдье.