Монгол Улсын Ерөнхий сайдын ОХУ-д хийсэн албан ёсны айлчлалын үеэр ЗТБХБ-ын сайд Х.Баттулга, ОХУ-ын Тээврийн сайд И.Е.Левитэн нар Монгол Улсын экспортын ачааг ОХУ-ын нутаг дэвсгэрээр дамжуулан тээвэрлэх тухай санамж бичигт гарын үсэг зурсан байна. Уг санамж бичигт гарын үсэг зурснаар ОХУ-ын нутгаар дамжин өнгөрч байгаа манай экспортын ачааг хөнгөлөлттэй тарифаар тээвэрлэх боломж бүрдэх юм. 

Монголын экспортын ачааг тусгай хөнгөлөлттэй тарифаар тээвэрлэснээр УБТЗ-ын тээвэрлэх ачааны хэмжээ эрс нэмэгдэж, манай бүтээгдэхүүн Япон, Солонгос зэрэг дэлхийн өндөр хөгжилтэй орнуудад худалдаалагдах боломж бүрдэх юм.

Монгол Улсын Ерөнхий сайдын энэ удаагийн айлчлалын хүрээнд төмөр замтай холбоотой хэд хэдэн асуудал яригдаж, зарим нь хоёр орны Ерөнхий сайд нарын хамтарсан мэдэгдэлд тусгагджээ. Тухайлбал, УБТЗ-ын дүрмийн санг 250 сая ам.доллараар нэмэгдүүлэх, шинэ төмөр зам байгуулах ажилд Оросын төмөр замууд нээлттэй хувьцаат нийгэмлэг болон Монголын Дэд бүтцийн хөгжил компани идэвхтэй оролцох гэх мэт цөөнгүй асуудал яригдсан байна.