НИТХ-ын хуралдаанаар бизнес эрхлэгчдэд тулгамдаж буй асуудлыг хөндөж төлөөлөгч Ж.Сандагсүрэн санал гаргалаа.

Төр хувийн хэвшлийн түншлэлийн асуудлууд хариуцаад явж байхад хот нэг асуудал дээр дутуу анхаарч байгаа нь анзаарагддаг. Түүний НИТХ-ынхан нөхөж хийх ёстой гэж хардаг.

Өчигдөр Засаг дарга Нийслэлийн Худалдаа аж үйлдвэрийн танхимынхантай уулзаж асуудлууд ярьж байх шиг байна лээ. Нийслэлд бизнес эрхлэх таатай орчин бүрдүүлэх, Бизнесийн эрх чөлөөг олгох тал дээр тодорхой төлөвлөгөө гаргаж ажиллах ёстой юм.

Хуулийн дагуу асуудал хөөцөлдөөд явахаар, тухайлбал зогсоол будаж шунхдаад юм хийе гэхээр 10 хавтас баримт бүрдүүлж ирэхийг шаарддаг. Тэрийг нь хөөцөлдөх гэж бүтэн жил болдог. Хувийн хэвшлийнхэн төлөөлөгчдөөс тусламж гуйгаад орж ирэхээр улаан нүүрээ улалзуулаад явж байж хугацааг нь наашлуулах гэх мэтээр ажлыг бүтээдэг муу жишиг тогтоод байна.

Барилга байшин бариад ашиглалтад оруулах болоход хяналтаар нь оруулъя гээд бидэн рүү яриад байх юм. Жагсаалт руу оруулаад өгөөч гээд... Оны өмнө барилгаа хүлээлгэж өгөөд мөнгөө авах гээд байна шүү дээ хүмүүс. Гаргаж байгаа комиссоо 5, 10-аар нь гаргаж ажиллуулмаар байна. 5-10 хүн гарч ажиллаад хүсэлтээ өгсөн даруйд нь асуудлыг нь жагсаалт руу нь бөөнөөр нь оруулаад цэгцлээд дуусгаж, хүмүүсийг бизнесийг эхлүүлмээр байна.

Өнгөрсөн зун Эдийн засгийн хорооноос бизнесийн эрх чөлөөтэй холбоотой комисс гараад ажиллаад бид нар асуудлууд яриад, тогтоолын төсөл гаргаж Тамгын газар руу өгсөн. Биелэлтийг гаргаж байгаа гэж найдаж байна.

Тиймээс эдийн засгийн хорооны доор ч юмуу Хотын бизнесийн эрх чөлөөг нэмэгдүүлэх гэдэг юмуу ийм түр хороо байгуулаад, энэ чиглэлийн олон асуудлуудад судалгаатай хандах шаардлагатай гэж харж байна. Татварын орлогын 70 хувийг ХХОАТ болон ААНОАТ бүрдүүлдэг. Тиймээс Төрийн захиргаа талд ийм бүтэц гарч болохгүй гэвэл ИТХ талд энэ төрлийн бүтцийг гаргаад бизнесийн процесс тал дээр нь анхаарч ажиллах саналтай байна.

Ж.Сандагсүрэн: НИТХ-ын дэргэд Хотын бизнесийн эрх чөлөөг нэмэгдүүлэх түр хороо байгуулж, ААН-үүдийн үйл ажиллагааг гацаадаг асуудлуудыг цэгцэлье!