Улсын Их Хурлын гишүүн, УИХ дахь Монгол-Катарын парламентын бүлгийн дарга Г.Баярсайханаар ахлуулсан УИХ дахь Монгол-Катарын парламентын бүлгийн төлөөлөгчид Катар улсын Зөвлөлдөх зөвлөлийн дарга эрхэмсэг ноён Мохамед Бин Мубарак Аль Хулейфи-гийн урилгаар 2012 оны 2 дугаар сарын 10-наас 14-ний өдрүүдэд Катар Улсад айлчлав. Айлчлалын бүрэлдэхүүнд УИХ-ын гишүүн Д.Балдан-Очир, Р.Раш нар багтсан байна.

УИХ-ын төлөөлөгчид Катарын Зөвлөлдөх зөвлөлийн Цагаан ордонд Зөвлөлдөх зөвлөлийн дарга эрхэмсэг ноён Мохамед Бин Мубарак Аль Хулейфи-д бараалхсан байна. Бараалхалтын үеэр төлөөлөгчдийн тэргүүнүүд хоёр орны байгалийн баялаг зэрэг ижил төсөөтэй болон ялгаатай талуудаа дурьдан хоорондын харилцааны талаар харилцан санал солилцов. УИХ-ын төлөөлөгчдийн ахлагч Г.Баярсайхан Катарын эдийн засгийн үсрэнгүй хөгжлийг дурьдан Арабын улс төрийн хүрээнд Катар улсын байр суурь, дуу хоолой өсөн нэмэгдсэнийг тэмдэглээд Катарын байгалийн баялагаас олж байгаа их орлогыг нийгмийн хөгжилдөө хэрхэн зарцуулдаг болон баялагийн орлогыг хүн амдаа хэрхэн яаж хүртээдэг тухай харилцан ярилцаад Катар улсын Зөвлөлдөх зөвлөл, Монгол Улсын Их хурлын хоорондын харилцааг бэхжүүлэхийн төлөө байгаагаа илэрхийлсэн байна.

Монгол-Катарын парламентын бүлгийнхэн Катар улсад айлчлав