УИХ дахь Ардчилсан намын бүлгээс мэдээлэл хийх үеэр намын дарга Н.Алтанхуяг цахим үнэмлэх хэвлэлт болон бэлдэц, хурууны хээ таних тоног төхөөрөмж тойрсон асуудлаар сэтгүүлчдэд мэдээлэл хийлээ. Хамтарсан Засгийн газарт Тэргүүн шадар сайдын алба хаших хугацаанд нь Улсын бүртгэлийн ерөнхий газар эрхлэх асуудлынх нь хүрээнд харьяалагддаг байв. Харин одоо дээрх газар нь Хууль зүй, дотоод хэргийн сайдын мэдэлд шилжсэн билээ.Сүүлийн өдрүүдэд сонгууль болохоос өмнө иргэний цахим үнэмлэх хэвлэж, иргэдэд тараах боломжгүй болсон тухай Хууль зүй, дотоод хэргийн сайд мэдэгдэх болсон. Бодит байдал ийм биш, сонгуулийг будилаантуулахын тулд энэ мэтээр хорлон сүйтгэх ажиллагаа явуулж байна гэж Ардчилсан намын дарга Н.Алтанхуяг мэдэгдлээ. Учир нь бэлдэц байхад иргэний ухаалаг үнэмлэх хэвлэх ажлыг эхлүүлэхгүй байгаа. Дээр нь иргэний үнэмлэх хэвлэх компанийг тендэргүйгээр шууд шалгаруулсан гэх PR-ыг хүчтэй цацах болсон. Гэвч энэ ажил нь улсын нууцад хамаарч байсан учраас шууд гэрээгээр компанийг шалгаруулахаас арга байгаагүй. Дан ганц Тэргүүн шадар сайд дангаараа шийдээгүй, Сангийн яам болон Тагнуулын ерөнхий газраас зөвшөөрөл авч байж, “Бодь электроникс” компанид цахим үнэмлэх хэвлэх гэрээг байгуулах эрх олгосон гэж тайлбарлалаа. Сайд Ц.Нямдоржийн хоёр дахь хорлон сүйтгэх ажиллагаа нь хурууны хээ таних машиныг Сонгуулийн ерөнхий хорооны мэдэлд шилжүүлэх тухай шийдвэр аж. Уг нь хурууны хээ таних машин нь Улсын бүртгэлийн ерөнхий газарт байж гэмээнэ цахим үнэмлэхийн техникийн үзүүлэлтэй нэгдэнэ гэж үзэж, дээрх газрын өмчид байлгах шийдвэрийг гаргаж байжээ. Сонгуулийн ерөнхий хороо ч тухайн үед нь хүлээн зөвшөөрч байсан. Одоо болохоор энэхүү машиныг Сонгуулийн ерөнхий хороонд шилжүүлэх шийдвэр гаргаад байгаа.