Төсвийн байнгын хорооны өчигдрийн хуралдаанаар 2013 оны төсвийн хүрээний мэдэгдэл, 2014-2015 оны төсвийн төсөөллийн тухай хуулийн төслийг хэлэлцэж чуулганы нэгдсэн хуралдаанд оруулахаар боллоо.

2011 оны хоёрдугаар улиралд таван тэрбум ам.доллараар манай улсын өр нэмэгдэж, бид 9.6 тэрбум ам.долларын өрөнд орсон уу гэдгийг гишүүд асуулаа. Сангийн сайд асан С.Баярцогтын хариулснаар бол 9.6 тэрбум ам.долларын өр нь улсын болон хувийн хэвшлүүдийн гадаад улсаас авсан өр. Өөрөөр хэлбэл, манай улсын нийт өр буюу Засгийн газрын нийт өр нь 1.9 тэрбум ам.доллар байгаа аж.

Түүнчлэн өнгөрсөн жил манай улс уул уурхайн салбараас 1.2 их наяд төгрөгийг төсөвт төвлөрүүлсэн бөгөөд үүнээс 475.3 сая нь нүүрснээс орж иржээ. Харин өнгөрсөн хугацаанд 34 оронтой давхар татварын гэрээ хийснээс одоогийн байдлаар 90 орчим хувийнх нь гэрээний хугацаа дуусчээ. Одоо хүчин төгөлдөр байгаа Голландын гэрээг өөрчлөх хэрэгтэйг гишүүд сануулав.

Мөн Хуучин иргэний үнэмлэхийг иргэний цахим үнэмлэхээр солих ажлын хүрээнд улсын тэмдэгтийн хураамжаас чөлөөлөх хуулийн асуудлыг хэлэлцлээ. Тэмдэгтийн хураамжийн тухай хуульд зааснаар тэмдэгтийн хураамжаас чөлөөлөх хугацаа энэ оны зургадугаар сард дуусах байсныг энэ оны арванхоёрдугаар сарын 31-нийг хүртэл сунгахаар болсон юм.