ПАРИС./ФРАНС-ПРЕСС/. Пүрэв гарагт Францын шинэ Засгийн газар Елисейн ордонд анхны хуралдаанаа хийлээ. Хуралдаанаар танхимын гишүүдийн цалинг шууд 30 хувиар бууруулах асуудлыг хэлэлцэнэ гэж Ерөнхий сайд Жан-Марк Эйро лхагва гарагт мэдэгджээ.

"Сайд нарын танхимд танилцуулах эхний санал нь Засгийн газрын гишүүдийн бүгдийнх нь цалинг 30 хувиар бууруулах асуудал байх болно. Бид өөрсдөө үлгэр жишээ үзүүлэх ёстой" гэж Эйро "Франс-2" сувгаар шууд ярилцлага өгөхдөө хэлсэн байна. Түүний хэлснээр, энэ арга хэмжээ нь шинээр сонгогдсон Ерөнхийлөгч Франсуа Олландын сонгуулийн амлалтуудын нэг бөгөөд үүнийг Засгийн газрын тогтоолын дагуу албан ёсоор хэрэгжүүлэх болно. Дашрамд дурдахад, төрийн тэргүүний цалинг ч мөн 30 хувиар бууруулна.

Үүнээс гадна, Эйро шинэ Засгийн газраас гаргах эхний шийдвэрүүд нь сайд нарын танхимын ажилтнуудын нэр хүндийг дээшлүүлэхэд чиглэгдсэн гэдгийг мэдэгджээ.
Шинэ Засгийн газрын бүрэлдэхүүнийг Ерөнхий сайд, Ерөнхийлөгч нар удаан хугацаанд зөвлөлдсөний дараа лхагва гарагийн орой танилцуулсан байна. Засгийн газрын бүрэлдэхүүнд 35 сайд орсон бөгөөд тэдний 30 нь урьд нь ямар нэгэн төрийн байгууллагыг удирдаж байгаагүй хүмүүс ажээ.

Гэхдээ гол яамдын сайд нараар илүү туршлагатай улстөрчдийг томилсон байна. Тухайлбал, Францын Гадаад хэргийн сайдын албан тушаалд 1984-1986 онд Засгийн газрыг тэргүүлж байсан Социалист намын хамгийн нөлөө бүхий төлөөлөгчдийн нэг болох Лоран Фабиус томилогджээ. Бретанийн Бүс нутгийн зөвлөлийн дарга Жан-Ив Ле Дриан Батлан хамгаалахын сайд болсон бол Франсуа Олландын сонгуулийн кампанит ажлыг удирдаж байсан Пьер Московисиг Санхүү, эдийн засаг, үйлдвэр худалдааны сайдын албан тушаалд томилсон байна. Харин сонгуулийн өмнөх сунгаанд Олландын албан ёсны төлөөлөгч байсан Мануэль Вальс Дотоод хэргийн сайд болжээ.
Хэдийгээр пүрэв гарагт Францад Бурхныг алдаршуулах баяр тохиож, амралтын өдөр байсан боловч яамд, байгууллагуудын ажил өглөө эрт эхэлсэн байна. Николя Саркозиг сонгуульд ялагдсаны дараа огцорсон Франсуа Фийоны Засгийн газрын гишүүд шинэ сайд нарын танхимд ажлаа хүлээлгэн өгчээ.

Сайд нарын цалинг бууруулах асуудлыг хэлэлцэнэ